Charter Document - 02520370

Wir bruder Vlreich abbt von Raitenhaslach verjehen vnd tun chunt mit aller vnser samnung alle den di disen brief lesent oder horent lesen das vns der ersam vnd edel riter her Ludweich der Grans gechauft vnd gegeben hat ledichleichein des ersten den hof ze Reichpoching vmb sehs vnd zwainzich phunt Salzpurger phenning zv einem ewigem selgeret von seinem vater des jartag wir begen schuln an sant Georii tag dez nahts an der porten in der chapell mit einer vigili dez morgens mit einer messe vnd schol vns am dem selben tag von dem hof gedient vnd gegeben werden ein phunt phenning vmb viesch aller samnung Dar nah hat der vorgenant edel riter her Ludw[eich] der Grans auh vns vnd vnserm gotshaus gechauft mit des erwerigen herren vnd piescholfs Chunrats von Salzpurch vrlaub vnd auh mit dem rat hern Ortliebs von Walde von Vlreicheim dem Tanner vnd purger ze Muldorf vmb sehs vnd ahtzich phunt Regenspurger drei hof ze Polling di genant sint Schermaiershof Prukkshof Wolfershof vnd vns di selben gegeben ledichleichein zv einem ewigem selgret sein selbes sei vnd aller seiner vorvodern vnt nahchomen sel hail vnd selden Er hat auh vns gegeben vnd gechauft einen hof der genant ist Winpossing von herm Eberharten dem Chalp vmb ahtzehen phunt Regenspurger vnd ob vns dehainerlai arbait oder chost dar auf ist gegangen do fur hat er vns geben sehs phunt Regenspurger Daz gut ist alles geaht zv dreuzehen phunten gult Salzpurger phenning Von dem gut swer denn herre vnd abbt ist der schol vns aller samnung ewichleichein alle vreitag geben sehtzich phenning Salzpurger vmb viesch Wser aver daz daz man der fiesch an dem vreitag nicht gehaben meht so schol man sev vns dar nah an dem nehsten tag geben oder in der nehsten wohhen dar nah zwai mal geben vnd schuln wir des an dehain ander vnser phrunt niht engelten Gescheh auer daz von dehainer versaumchait daz man vns des niht stet behilt vnd vns di viesch niht engeb als offt daz versaumt wer als offt schuln di selben phenning geben werden dem erwerigen abbt von Salmonsweier vnd schol auh alle jar in der weisung der selb abbt den chelner dar vmb vragen ob es behalten sei vnd gegeben der sammung oder niht Vnd daz ditz seligs selgret dem vorgenanten erwerigen herren vnd vrevnt herm L[udweich] dem Grans vnd auh vns stet beleih hat er selben mit samt vns den vorgenanten erwerigen vater herren vnd weiser abbt Vlreichein von Salmonsweiler vleizchleichein gebeten daz er im vnd vns daz gestetigt hat an disem brief mit seinem insigel Vber daz alles hat auh vns der offt vorgenant herre vnd vrevnt her L[udweich] der Grans sant Erasmi alter in dem vorzaihen gestift vnd gewidemt mit alle dem daz dar zv gehort vnd hat vns dar zv gechauft den hof ze Tal vmb ahtzen phunt Salzpurger Daz auh di gutet vnd ditze selgeret von debainem seinem erben nah seinem tot vns meg gechrencht werden hat er vns es alles auh gestetigt an disem brief mit sein selbes insigel Dar vber wir abbt Vlr[eich] von Raitenhaslach mit samt vnser samnung vergehen vnd geloben an disem brief daz wir di ableib vnd auh den jartag seines tots mit der vigili vnd mit den messe singen vnd mit ander gaistleicher gutet allen weis begen schuln als eines anders vnder vns bruders vnd briesters ableib Daz auh wir daz alles stet behalten vnd von vnsern nahchomen ewichleichein behalten wert verinsigeln wir disen brief mit des vorgenant vnsers maister vnd erwerigen abbt Vlr[eich] insigel von Salmonsweiler vnd mit vnsers selbes insigel Dez sint zevch her Ortlieb von Waldeg her Alram der Rotawer her Seifrid der Ahaimer her Hainr[eich] der Pahner her Eberhart der Chalb Ch[unrat] der Nevslingner her Fridr[eich] der pharrer von Purchausen her Seibot des Grans Schreiber her Ilsunch vnser prior her Gebh[art] der subprior maister Vlreich von Salmonsweiln her Ditreich von Permeting her H[ainreich] der chelner her Hainr[eich] der custer vnd ander biderb levt mer Der brief ist gegeben do von Christes burt waren tausent drev hundert vnd sehs jar Servacii episcopi