Charter Document - 02520369

Ich Wlfing Goltekker purchchraf von Ditmenning tun chunt vnd vergieh allen den di disen briefen sehent oder horent lesen daz Ditreich der Hulber pavman datz Nidernpuoch vor mir vnd vor manigen erwerigen mann datz Dietmenning sich verzigen hat auf des erwerigen abbt Vlreichs vnd seines conuents gnad aller der ansprach di er gehabt hat auf daz selbe gut ze Nidernpuch vnd an twanchsal vergehen hat daz er an dem selben gut dehain reht hat vnd gehabt hat Vnd do von hat er daz selben gvt ze Nidernpuch von dem vorgenennten erwerigen abbt Vlreichen von Raitenhaslach vnd seinem gotshaus bestanden zv einem jar ze pavmans reht nah allem dem reht vnd gewonhait als ander ir gotshaus aigen levt bestent von im als ir vrwar Vnd daz in di selb furziht furbaz imen meg bechrenchen gib ich disen brif verinsigelt mit meinem insigel Dez sint zevch her Fridreich der chamerer Ekhart der Aichaimer Zachareis der Panicher her Rudpreht der Imzigner der Puhher rihter Wernhart der Zugswert Hainr[eich] Ot Frid[reich] di Lemper Vlreich von Sitlesdorf Hainreich der Weilhaimer enhalbs pachs Fridr[eich] Chrophel Symon der Schreiber Ch[unrat] von Abelsperch Engelfrid des Hulbers bruder Ch[unrat] des Hvlbers aidem von Reuthaim Hainreich des selben vater von Obernpuch Ortlieb von Munichaim vnd ander bider levt mer Der brif ist geben do von Christes burt waren tausent drew hundert vnd sehs jar an sant Gregorii tag