Charter Document - 02520367
| Charter Number: | 02520367 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | German |
| Charter Origin: | Lay |
| Charter Type(s): | Confirmation |
| Date: | 1305 |
| Date type: | Internal, A.D., Feast |
| Resource Link(s): |
Monasterium.net |
Charter:
Ich Ludweich der Grans tun chunt alle den di disen brief ansehent daz Hainreich mein aigen man von Pihscholfstorf vnt sein erben Hainr[eich] Vlr[eich] Fridr[eich] Gedrevt vnt Chunr[at] sein aidem enschied lizzen vmb alle den chrieg vnt ansprach den er Hainr[eich] vnt sein vorgenanten chint vnt sein aidem ie heten gewnen von ir chintleichein tagen hintze dem gotshaus ze Raitenhaslach vmb di hub vnd vmb di mul ze Piescholfstorf swi di genant waren an hern Fridr[reich] den chamerer von Raitenhasl[ach] vnd herren Seiboten den pharrer Tumaier meinen rihter vnt Fridr[eich] den schergen vnt Vlr[eich] der rihter von Weilhart waz ir vberman Di schieden also daz alle di chrieg vnt ansprach gar vnt gentzleichein ab weren vnt daz Hainr[eich] vnt seinew chint vnt Ch[unrat] sein aidem dehain ansprach hieten furbaz hintze dem gotshaus ze Raitenhasl[ach] vmb di oben geschriben sahh vnt daz der erwerig abbt Vlr[eich] von Raitenhasl[ach] Hainr[eich] vnt seinen chinden vnt seinem aidem geb an sehtzch phumfe phunt phenning Otingner Vnt daz der chrieg aller ding also zeder legt sei vnt verriht dar vber gib ich dem gotshaus ze Raitenhasl[ach] disen brief verinsigelten mit meinem insigel Dez sint zeug di vorgenanten schidlevt Fridr[eich] von Spieglorn Ch[unrat] von Heltenperg Andre von Phaffenhofen Vlr[eich] von Posendorf Ch[unrat] von Gunprehtstorf Zachrais Ch[unrat] dez abbts probst vnt ander zevg genueg Der brief ist geben do von Christes waren drewzehen hvndert jar dar nah in dem pfumt jar an sant Marci tag