Charter Document - 02520366

Ich Reicher vitztum von der Rot vergih offenbar daz ich durih got vnd vnserr frauwen willen vnd durih meiner sel hail vnd seld vnd allen meinen voruodern ze hilf vnd ze trost han geben meins vrein vnd lediges aigens datz gut datz Protmansfurt vnd mein gut datz Teufstat vnser frauwen vnd dem gotzhaus ze Raitenhaslach ze rehtem selgrat fur vreiz vnd ledigs aigen ewichleichen ze besitzen mit allem daz da zu gehort besuechst vnd vnbeschuechst swi iz genant ist vnd zehen pfunt pfenning Regensburger di han ich auh dem ersam apt Vlreichen ze Raitenhaslach gegeben daz er da mit chauf ein pfunt geltz zu dem vorgenanten gotzhaus ze Raitenhaslach also mit der beschaiden red daz man aller jerchleich an meinen jartach der sammung ze Raitenhaslach sol geben vihsch wein vnd semeln vnd daz man ewichleich vor sand Stepfans alter in dem muenster sol haben ein lieht daz durih die naht prinn vnd alle tag sol auf dem selb alter ein mess gesprochen werden auer swehlich jar daz niht wirt behalten daz selb jar sol aller der gelt vnd nuhtz der von den guten wirt werden geben ir maister vnd der sammung hintz Salmansweiler als oft vnd daz gescheh Idoh all die weil vnd ich leb sol der sammung der dienst geben werden dez nehst mentachs nah sand Georin tach an meins vater jartach Wernhartz vnd sol auh gedaht werden Hailweigen mein muter vnd Chunratz mein hausfrauwen vater mit der vigili vnd mit den messen Vnd daz ditz selgret stet vnd vnzeprochen ewichleich beleih da vber gib ich Reicher der vitztum dem gotzhaus ze Raitenhaslach disen prief versigelten mit meinem insigel ze einem waren vrchund Diser sache vnd selgretz sint zeug her Chunrat der Trenbech Ortneit der Tuntz Frid[reich] der Sigenhaimer her H[ainreich] der Harzchiricher Wernhart der Visler Woluel von Geinchouen Ditmar der Runtinger Marichart der Morohtinger Woluel der Leubel Ch[unrat] vnd H[ainreich] von Heltenperg vnd ander erwerig zeug genuch Der prief ist geben datz Messing do von vnsers herren geburt waren drevzehen hundert jar vnd in dem fumften darnach dez pfintags in der heiligen oster wochen