Charter Document - 02520365

Ich Vlreich von Halleprukk vergieh vnt tun chunt allen den di disen brief sehent oder hornt lesen daz ich mit meiner hausfrawen Metzen gunst vnt auh mit aller meiner chinde Chunrats Vlreichs Gebharts Wernh[arts] meiner svn Diemuten vnt Chunigunten meiner tohter gutem willen verchauft vnt geben haben ein viertail aus dem gut ze Halleprukk mein rehtes aigen mit allem dem daz da zv gehort gesuhts vnt vngesuhts dem ersamen abbt Vlreichein vnt seiner samung hintze Raitenhaslach vmb ahtzehen Schilling Salzburger phening vnt meiner vorgenanten hausfrawen vnt chinden svnn vnt tohtern ze levtchauf vnt auh daz si sich sein gutleich vnt willichleichein verzigen habent sehs Schilling phenning Daz auh der vorgenant abbt Vlr[eich] vnt sein samnung vnt gotshaus dehainerlai mve vngemach oder schaden vmb disen chauf von mir selben oder von meinen chinden vnt von imen anderem enphahen schull oder mug han ich im gesetzt zv einem furphant mein hub datz Einharting mit sotaner beschaidenhait swi tan schaden er enphah von imman daz si den habent auf der selben hvb mit meiner hausfrawen M[etzen] vnt aller meiner chint gutem willen Vnt zv einer ewigen stetichait ditz chaufs gib ich Vlr[eich] Hallerprukker dem offt genanten ersamen abbt Vlr[eich] vnt seinem gotshaus disen brief verinsigelt mit dem insigel herren Ludweichs des Grans von Vtendorf vnt mit meines selbs insigel Dez sint zevgh her Ilsunch prior her Hainreich subprior her Hainreich der brudermaister her Ot der sangner Wernher von Aich Fridr[eich] der Darm Hainreich des selb sun Fridreich vnt Chunr[at] von Halleprukk Hainreich der Tren Ditmar von Pheffing Chunr[at] sein svn Wolf hart von Mad Wilhalm Ortel Chunr[at] Reicher dez abbts [k]neht Ortlieb dez chelners kneht Hainreich der Helt vnt ander mer Diser brief ist geben do von Christes burd waren dreutzehen hundert jar dar nah in dem phumft jar an sant Ruprehts tag in der vasten