Charter Document - 02520364

Wir Ott vnt Stephan von gotes gnaden phlantzegraven ze Rein vnt herzog ze Baiern verjehen offenber an disem brief daz der ersam abbt Vlr[eich] vnd di sammung ze Raitenhaslach haben chauft von vnserm trewven Ortlieben von Aschew den hof datz Rehpoching vnt den man der dar auf gesessen ist ze rehtem aigen den er vnd sein vater von vns ze lehen het mit alle dem daz dar zv gehort besuht vnd vnbesuht mit samt den echern di aus dem hof geprohhen warn vnt von Ditmars dez Heglers vnt Chunigunten seiner hausfrawen tot waren den Aschawer ledichleichen wider angevallen Vnt wan wir vnser lehen vngern minnern hat vns der vorgenant Aschawer mit andern seinem aigen den selben hof ze Rehpoching vnt den man da selben mit einem ander man wider lait vnd hat daz selben von vns ze lehen phagnen dar vmb daz wir dem gotshaus ze Raitenhaslach den offt genanten hof ze Rehpoching vnt den man haben geaigent vnt sein auh dez selben hofs salman als reht ist fur allen gewalt Ez hat auh der selb man vor vns verjehen offenbar daz weder er noh sein bruder noh sein eriben noh dehain sein frevnt dehain reht noh eribschaft haben auf dem selben hof Vnd dar vmb daz dem gotshaus dehain chrieg oder schaden meg aufgesten vmb den chauf hat der Aschawer dem abbt vnd der samnung vir gut gesetzt ewichleichein ze einem furphant swelihen schaden si do von enphieng daz si den haben auf den selben guten di sint also benant Aich Prantstat Hanchreting Odenholerperch Dez sint zevch graf Alram von Hals Chunr[at] von Preising Vlr[eich] druhsetz von Ekkenmul Walther von Taufchirchen Chunr[at] der Sumerawver Hilprant Eisengreim Chamerawer Hartlieb der hofmaister Chunr[at] der Eitzigner Chunr[at] der Neunchircher Rapot von dem Stain vnt H[ainreich] sein svn Fridr[eich] von Prawnew vnt ander zevg genueg Vnt daz di sahhe alle stet dem gotshaus vnt vnzeprohhen beleiben haben wir disen brief verinsigelt mit vnsern insigeln mit sam dems Aschawers insigel zv einem vrchunt Diser brief ist geben anno domini millesimo trecentesimo quinto an sant Mathie tag