Charter Document - 02520361
| Charter Number: | 02520361 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1304 |
| Date type: | Internal, A.D., Calendar |
| Resource Link(s): |
Monasterium.net |
Charter:
Chunradus dei gracia sancte Saltzburgensis ecclesie archiepiscopus apostolice sedis legatus religiosis viris et in Christo sibi dilectis Vlrico abbati et conventui monasterii in Raitenhaslach ordinis Cisterciensis eiusdem Saltzburgensis dyoecesis salutem in omnium salvatore Cum discretus vir Ludwicus Granso devocionis zelo ductus tres curias in parrochia Flozzing nostre dyoecesis sitas in villa videlicet Pollingen unam que vulgariter dicitur Scherhof in superiori parte ville aliam dictam Prukhof in media parte ville iuxta fluvium et terciam in inferiori parte ville que curia Wolfheric vulgariter nuncupatur cum omnibus earundem curiarum pertinenciis cultis et incultis quesitis et inquirendis ab Vlrico dicto Tanner cive nostro Muldorfensi qui eas a nobis et ecclesia nostra tenuit titulo feudali pro consolacione et pitanciis vestro conventui conpararit nos qui interno caritatis affectu prosequimur vos et eiusdem vestri ordinis professores id quod pro consolacione vestra in hac parte quoad modum empcionis predicte factum esse dinoscitur gratum gerentes facta renunciacione feudi de dictis curiis in manibus nostris libere ac sponte per Tannarium supradictum ius proprietatis nobis et ecclesie nostre in predictis curiis competens vobis donamus et tradimus ac in vos et monasterium vestrum transfundimus perpetuo possidendum pure et simpliciter propter deum et in nostri salutarem memoriam apud vos iugi devocione de cetero peragendam In cuius rei testimonium et evidenciam pleniorem vobis damus presentes litteras nostri sigilli robore communitas Datum Salczburge anno domini millesimo trecentesimo quarto pridie nonas augusti