Charter Document - 02520359

Ich Hainreich von Ror vnd ich Eberhart der Chalp verjehen offenbar vnd tun chunt allen den die disen prief lesent oder horent lesen daz ich Eberhart der Chalp mein zwen hof datz Winpezzing vnd datz Strazz die mein lehen waren von herm H[ainreich] Ror han ze chauffen geben dem ersam apt Vlreichen vnd dem gotzhaus ze Raitenhaslach mit meins vorgenanten herren hant her Heinr[eich] von Ror allev dev reht vnd nutz die ich an den vorgenanten houen het mit allem dem daz da zu gehort besuochst vnd vnbesuechst swi iz genant ist Vnd wan der chauf also ist geschehen vnd ergann han ich Hainreich von Ror mit verhennuss vnd gutem willen meiner hausfrauwen Margareten die aigenschaft der offt genanten hof ze Winpezzing vnd datz Strazz wan wir dannoh dhainen erben heten gegeben vnd aufgeseld vnser frauwen vnd dem gotzhaus ze Raitenhaslach ewichleich ze pesitzen vnd ze haben fur vreiz vnd ledigs aigens stat rehts selgretz sam ander aigen daz daz gotzhaus ze Raitenhaslach hat Vnd daz der chauf vnd auh die gab der aigenschaft der oben penanten hof immer ewich sei noh daz dhain chriech oder ansprach hintz dem gotzhaus ze Raitenhaslach mug erfunden werden oder auf gesteen da vber geb wir paid disen prief ze einem waren vrchund versigelten mit vnser paider insigel Diser sache aller sint gezevg bruder H[ainreich] der prior bruder Gebh[art] der Chalp supprior Ch[unrat] der Widmer Pauls vnd Emreich von Purchausen her Chalhoh von Aich her Frid[reich] der Praunauwer her H[ainreich] von Pahh Frid[reich] der Darm Wernher von Aich Vlschalich vnd Ruger von Schoberch Albreth dez Rorez chelner Ortel Wilham Ortlieb dez aptz kneht H[ainreich] der Zaglau wer vnd ander erwerig zevg genuch Der prief ist geben do von vnsers herren geburt waren dreuzehen hundert jar vnd in dem vierden da nah an sant Jacobs tach ze Raitenhaslach