Charter Document - 02520357

Ich Hainreich Ceterler vergih vnt tun chunt alle den di disen brief lesent oder horent lesen daz ich drew tail einer hvb ze Hallerprukk di ich gehabt han von meinem herren herm Walther von Taufchirchen han verchauft mit seiner hant vnt mit seinem gutem willen dem erwerigen abbt Vlreich[en] vnt seinem gotshaus hintze Raitenhaslach mit alle dem daz dar zv gehort gesuhtz vnt vngesuhtz swi daz genant ist vmb zehen pfunt phenning Salzburger muns vnt han in den selben chauf gestetigt fur vrei vnt fur ledigs aigen Vnt daz der chauf also ergangen sei dar vber hat mein vorgenanter herre her Wal[ther] von Taufchirchen nah meiner pet vnt vlig disen brief verinsigelt mit seinem insigel zv einem waren vrchunt daz er di aigenschaft hat gegeben dem vorgenanten gotshaus hintze Raitenhasl[ach] also daz ez dem selben gotshaus ewichleichen beleih fur vreis vnt ledigs aigen Dez chaufs sint zevg her Chunrat der Tausenperger her Chaloh Zvchswert der Eitzigner von Chraiburch her Ortneit Tunz Hainrich von Nopping Eberwein der Westerchircher Vlreich Chunr[at] vnt Fridreich von Halleprukk Hainr[eich] Gaestel Chunr[at] der Vogler rihter von Travnstain Chunr[at] Meller Vlreich im Stadel Vlreich chastner vnt ander bider levt mer Der brief ist geben do von Christes burt waren tausent drew hundert jar dar nah in dem vierden jar an sancti Alexii tag