Charter Document - 02520356

Ich Walther von Taufchirchen mit samt meiner hausfravwen vroen Herwrgen verjehen vnt tun chunt allen den di disem brief lesent oder horent lesen daz wir ein chrieg haben gehabt gegem dem erwerigen abbt Vlreichein vnt seinem gotshaus datz Raitenhaslach vmb zwen halb hof genant datz dem haus in Osterreich bei Ips vnt vmb ander vier gut da pei nahen ligent datze Chrotental Dez haben wir vns ervarn vnt sein dez geweist daz weder ich noh mein vorgenanten hausfravwe froe Herwrch hern Chunn tohter dez Gutraters noch dehainer vnser erb dehain reht an den vorgenanten guten niht haben gehabt Vnt do von haben wir vns verzigen gentzleichein vmb daz selben gut allez chrigs vnt aller ansprah Wir gehen auh daz vns di vorgenanten herren abbt Vlr[eich] vnt sein samung habent geben zwai halb vas weins zv einer lieb vnt zv einer minne daz wir daz selben gut vnt ander ir vrwar dez vleizichleicher schuln vnt wellen schermen Do von daz in furbaz von vns noch von vnsern erben dehain chrieg ansprach oder schaden mug wider varn geben wir in disen brief verinsigelten mit vnserm insigel Diser sahhe sint zevg grafe Albreht von Hals her Seifrid von Frawvenperch her Chunrat vnt her Hainreich von Preising her Ortlieb von Walde her Chunr[at] der Tehigner her Hainr[eich] vnt her Eberh[art] di Harschircher her Reicher der vicedum von der Rot her Ilsunch der prior von Raitenh[aslach] her Chunr[at] der chelner her Fridr[eich] der chamerer her Ainweich her Gebh[art] der Chalp vnt ander erwerig levt mer Der prief ist geben do von Christes burt waren tausent drew hvndert jar dar nah in dem vierden jar an sancti Alexii tag