Charter Document - 02520354

Ich Ortlieb von Wald tvn chvnt allen den di disen brif ansehent oder horent lesen daz ich Vlrichen dem Tanner bvrger von Mvldorf drei hof ze chavffen gab datz Polling fvr reht aigen vnd verzech mich der ich vnd mein havsfrawen vnd mein erben di selben hof hat der vor genant Vlr[ich] der Tanner herrn Lvd[weich] dem Grans ze chavfen gegeben vnd der selb Grans hat di selben vorgenanten hof datz Polling vnser frawn hintz Raitenhaslach gegeben vnd der samnvng fvr reht aigen ze ainem ewigen selgeret im vnd seinen vorvodern Vnd dvrch der lieb dev ich hintz vnser frawn han vnd zv dem chloster ze Raitenhaslach vnd dvrch der lieb vnd frevnschaft willen di ich han zv herrn Lvd[weich] dem Grans han ich meinen willen vnd mein gvnst da zv gegeben daz der vorgenant Tanner di drei hof datz Polling herrn Lvd[weich] dem Grans vnd dem gotshavs ze Raitenhaslach ze chavffen hat gegeben vnd verzeich mich der fvr mich fvr mein havsfrawen vnd fvr alle mein erben daz wir fvrbaz nach den vorgenanten hofen datz Polling dehain ansprach svln haben Daz daz dem chloster ze Raitenhaslach vnd der samnvng da selben stet vnd vnzerbrochen beleib gib ich in disen brif mit meinem insigel versigelt vnd diser sache sint zevg di herren ze Raitenhaslach her Ilsvnch der prior her Chvnr[at] der chelner her Hainr[ich] der chastener her Ort[lieb] her Gebhard der Chalb vnd her Hainr[ich] der Hvter dar nach Chvnr[at] der Techinger von Lentzesperg Hainr[ich] der Pvchpech Chvnr[at] von Talhaim Christan von Chnosing vnd Chvnr[at] der Ahmanger Der brif ist gegeben da von Christ geburt waren tavsent jar drev hvndert jar vnd in dem virden jar an dem vreitag vor sand Vlreichs tag