Charter Document - 02520353

Ich Vlreich der Tanner purger von Muldorf vergih vnd tun chunt allen den die disen prief lesent oder horent lesen daz ich vnd Diemud mein hausfrauw mit guten willen vnd wissen vnserr chint Chunratz Margareten vnd Preiden mein drei hof datz Polling die ich fur ledigs aigen het gechaufet von herm Ortlieb von Wald dez reht aigen sie waren vnd die ich mein herren von Salzburch auf het geben ze rehten aigen vnd si her wider enpfie ze rehten lehen han verchauft dem edeln vnd dem beschaiden ritter herm Ludweich dem Grans vmb fumf vnd ohzich pfunt Regenspurger pfenning vnd wan der selb her Ludweich der Grans die selb hof datz Polling hat geben vnser frauwen vnd dem gotzhaus ze Raitenhaslach an lediges aigen stat wan er die aigenschaft von meinen herren von Salzburch gewnnen hat die ich im willichen het gegeben Dar vmb gib ich vnd mein hausfrauw Diemut vnd vnser vorgenantev chint dem ersam apt Vlreichen vnd vnser frauwen vnd dem gotzhaus ze Raitenh[aslach] disen prief versigelten mit meinen insigel ze einem waren vnd ewigem vrchunt daz wir nimer mer ewichleich dhain reht ansprah noh vingerzaig nah den vorgenanten hofen datz Polling suln oder mugen haben oder gewinnen wan si der Grans ze rehten selgret hat geben vnser frauwen vnd dem gotzhaus ze Raitenhaslach Dez sint zeug her prior Ainweich von Wazzerburch her Frid[reich] der chammerer Vl[reich] von Muldorf Ch[unrat] der Gall Ekk Andree sin bruder Vl[reich] der Winperger Ch[unrat] Rudolfs sun Ortel Wilham dez apts chneht Ch[unrat] von Oberhouen vnd ander erwerig zeug genuch Der prief ist geben datz Muldorf do von Christez burt waren dreuzehen hundert jar vnd in dem vierdem jar dar nah an sant Veitez tach