Charter Document - 02520352

Ich Seifrid von Aichelberch vergih an disem prief daz ich ein hub datz Aichelberch sehzich pfenning geltz han gegeben ze chaufen dem ersam apt Vlreich vnd sinem gotzhaus datz Raitenhaslach vmb siben pfunt pfenning an sehzich So vergih ich Chunrat sein bruder daz ich ein ander hub datz Aichelberch auh sehzich pfenning geltz han verchauft dem vorgenanten herren von Raitenhaslach vmb nevn pfunt pfenning vnd haben vns der selben hub verzigen wir paid Seifrid vnd Chunrat vnd vnser paider hausfrauwen vnd alle vnser chint vnd haben si aufgeben mit herren hant wan si lehen waren von herrn Haugen von Gunthering Da zu so vergih ich Hauch von Gunthering vnd mein sun Ortolf offenbar daz wir die aigenschaft der selben hube datz Aichelperch haben aufgegeben dem oft genanten apt von Raitenhaslach vnd haben von im dar vmb enpfangen viert halb pfunt pfenning Vnd haben die vorgenanten hub also all vier ich Seifrit vnd Chunr[at] von Aichelberch vnd ich Hauch vnd mein sun Ortolf bestetig vnd geben fur vreiz vnd ledigs aigen vnser fraun vnd dem gotzhaus ze Raitenhaslach mit allem dem daz da zu gehort besucht vnd vnbesuechtz swi iz genant ist Vnd wan wir alle vier niht heten aigenev insigel so haben wir gepeten mit grozzem ernst vnd vleiz hern Fridreich von Torring daz er nah vnser pet disen prief hat versigelt mit seinem hangundem insigel ze einem waren vrchund aller der sache vnd dez chauffez als oben ist geschriben Dez sint gezeuch bruder Ot von Auzze her Hainr[eich] von Matzse bruder Ainweich von Wazzerburch H[ainreich] der Meuwer H[ainreich] der Gwikker Ch[unrat] von Ekk Ditmar von Moring H[ainreich] der preuwer H[ainreich] sein sun Vl[reich] Schel Reicher der Aichorn Hiltprand der aderlazzer vnd ander zeug genuch Der prief ist geben datz Ditmanning do von vnsers herren geburt waren drevzehen hundert jar vnd in dem vierden jar da nah an sand Potencianen tag