Charter Document - 02520351

Ich Ekhart von Tanne der Rorer vergich vnd tun chund an disem briff allen lewtten daz dev chlag vnd der chrieg di abbt Fridrich von Raytenhaslach gegen mir het vor herren Eberhard techent vnd richter zw Salczburg vmb daz gut ze Obernechinge lazen wart von vns payden an schidleut herr Eberhart pfarrer dacz sand Jorigen herr Chunrad Wyenner munich dacz Raytenhaslach vnd an Rudolfen von Talgew richter ze Salczburch also waz sy dar vber sprachen oder schiten daz solt wir peedew stat haben vnzeprochen vnd wer dez nicht entat der solt geuallen sein von allem dem recht daz er an dein vorgenanten gut hiet Dy selben schidlewt mit gemainem rat schieden also daz ich daz vorgenant gut ze Oberneching dem selbing abbt vnd seinem goczhaus ledichleich aufgab vnd iz her wider von im vnd von seinem goczhaus ze leibgedinge enphienge vnd ez hiet in nucz vnd in werschafft vncz an meinen tod vnd da von alle jar an sand Ruprechcz tag in dem herbst solte geben dreisikch pfenning Salczburger dem goczhaws ze Raytenhaslach zu einem vrchunde daz dy aygenschafft dez vorgenanten gucz dez selben goczhaws ist Vnd geschach daz von versavmunge daz ich dy selben dreisichk pfenning von sand Ruprechcz tage in acht tagen nicht engabe so solt ich ze hant von dem selben gut sechczig phfenning geben versaumbt ich daz dar nach in acht tagen so solt daz vorgenant gut dacz Obernechinge mit allem recht gewere vnd nucz versuchcz vnd vnversuchcz ledichleichen vnd vreileichen wider an angeuallen daz selbe goczhaws ze Raytenhaslach Ez sol auch nach meinem tod daz selbe leibgedinge derainen meinen erben anerben vnd sol daz goczhaws ze Raytenhaslach ledichleichen vnd an allen chrieg wider angeuallen Dar vber vergich ich an disem briff daz ich dye vorgenanten schidung stat wil haben vnd vnzeprochen vnd gib dar vber zu einem ebigen vrchundt disen brief mit dez capitels ze Salczburchk vnd mit meinem insigeln versigelt vnd sind diser sache czewg herr Weichard von Polnhaim charherr ze Salczburg maister Wernhart caplan in dez pischolfs hoff ze Salczburchk herr Hainreich von Visach Charel der Newnchiricher der Weizze von Lauffen Fridreich der Darme Hainreich vnd Ortl dez abcz chnecht von Raytenhaslach vnd ander pider lawt Vnd ist daz geschehen ze Salczburch do von Christus gepurdt waren tausendt jar drewhundert jar vnd dar nach in dem ersten jar an der heyligen martrar tag sand Tyburcii vnd Valeriani