Charter Document - 02520350

Ich Ekhart der junge von Tanne der Pollchaimer vergich vnd tun chund mit disem brief allen den die in ansehent oder hornt lesen das ich durich meines lieben vater pet hern Ekhartes des alten von Tanne vnd durich meiner lieben bruder sele den got genade durich seinew gute vnd durich meiner sele salichait wil state vnd auch gancz haben alles das geschefte vnd auch die state die si habent getan vnd verhantuest den lieben herren von Raitenhaslach vnd irem gotzhaws vmb den hoff ze Sigharting das ich furbas nimmer chain ansprach noch mein erben gewinnen Vnd sullen mich auch mein vorgenanten herren in ir pet vnd in ir bruderschaft nemen als si meinen vater vnd meinen bruder genomen habent Vnd das in das stat vnd gancz beleihe vnd vnzebrochen des gib ich in diesen brief versigelten mit meinem insigel ze einem waren vrchunde vnd ze einer ganczen statichait Vnd sind des gezeug mein ochaim her Otte von Goldeck vnd her Fridreich von Chamerr und Fridreich sein sun vnd der Greyffe von Alkersdorff vnd Otacker von Matse vnd Meindel von Chamerr vnd Engelprecht der Lantzinger vnd Wernhart der Schreiber vnd anderr ir gezeuge den es auch war gewissen ist Der brief ist geben ze Salczburg nach Christi gepurd tausent jar drewhundert jar dar nach in dem vierden jar in der vasten an des guten sand Rupprechtz tag