Charter Document - 02520349

Ich Jans vnd Nycla mein bruder von Pfeffing vergehen offenbar vnd tun chunt allen den die disen prief lesent oder horent lesen daz vnser vater Chunrat von Pfeffing dem got gnad hat geben ze chaufen seinen hof datz Gunzenperch mit allem dem daz da zu gehort versuechtz vnd vnuersuechts swi iz gnand ist dem erwerigen apt Chunraten vnd seinem gotzhaus datz Raitenhaslach vmb fumf vnd fumfzich pfunt pfenning vnd hat im bestetigt den selben hof datz Guntzenperch fur vreiz vnd ledigs aigen mit manigem piderm man die ir triwe vnd allez ir gut satzten ze einem furpfant vnser frauwen vnd dem gotzhaus datz Raitenhaslach swelich ansprache oder schaden daz gotzhaus ze Raitenh[aslach] enpfieng von dem chauf daz si den schaden scholten dem gotzhaus abtuen vnd ablegen als teuwer vnd der hof wer Daz waz geschehen do von christz geburt waren zwelif hundert jar vnd siben vnd sibentz jar an sant Johans tach ewangelistz Daz gestuend als lang daz daz gotzhaus ze Raitenh[aslach] ohzehen jar nutz vnd still gewer het dez hofs datz Guntzenberch Vnd wan wir ze der selben zeit chint vnd so junch waren daz wir dez selben chaufez niht gedahten sprachen wir daz gotzhaus datz Raitenhaslach vmb den oft genanten hof an mit dem reht Dez wart dev selb ansprach enschid lazzen an hern Wernharten den ersam techen von Gehay vnd an hern Fridreich von Torring an hern Chalhoh den Zuchswert vnd an sein bruder Charln Zuchswert die schieden iz also daz wir gestuenden von allem dem chriech vnd von allen den ansprachen die wir heten vmb den oft genanten hof datz Guntzenperch vnd wart vns da vmb ze leichauf geben vier pfunt pfenning Vnd daz wir zwen Jans vnd Nycla gelopten gewer sein vor allem reht vmb alle ansprach vnd chrieg fur vnser pruder Andreen vnd Christan vnd daz dem chauf vnd dev verrihtigunn also sei geschehen vnd daz daz gotzhaus ze Raitenhaslach ewichleich sei sicher vnd ledich vor allen ansprachen vnser vierer mein Jansen Nyclans Andreez vnd Christans da vber wan wir niht aigener insigel heten so hab wir gepeten den ersam techent von Gehay vnd vnsern herren hern Fridreih von Torring daz si disen prief habent versigelt mit ir hangunden insigeln ze einem waren vrchund der sache aller als oben geschriben ist Dez sint gezeuch her Chalhoh Charln vnd Wernhart Zuchswerten Rupreht von Imzing Frid[reih] Lamp Ch[unrat] Lamp Vl[reih] Lampotingner H[ainreich] Smerbeche Wolfhart Swindacher Ch[unrat] Vreioltzmoser Vl[reih] von Pfeffing Ot vnd Ch[unrat] die Talhaimer vnd ander erwerig zeug genuch Der prief ist geben datz Ditmenning do von vnsers herren geburt warem dreuzen hundert jar vnd in dem vierdem jar da nach an sand Gregorin tach Her Ch[unrat] der pfarrer von Fridolfing vnd her Vlr[eih] der pfarrer von Dietmening sint diser taidinch aller zeuch wan si derpei waren do daz wart getaiding vnd verscriben