Charter Document - 02520348

Ich Hainreich von Harschirichen vnd mit mir mein bruder Hartprecht tun chunt allen den die [disen] brief lesent oder hornt das mir der ersam abbt Vlreich vnd sein sammung datz Raitenhaslach von ir besundern trewn vnd lieb die si zu mir vnd zu meinem bruder Hartprechten habent mir habent gelobt all jarleichein ze geben zwen bruder schuech vntz meinen tod vnd ist das mich mein bruder uberlebt so sullen si iem die selben schuech geben auch vntz an seinen tod vnd ee nicht Noch sind die vorgenanten herren chainem vnserm erben nichtz gepunten es sei dann ob chain vnser erib dem gotzhaws so lieb tue vnd dien das man iem si gab anders ist in das gotzhaws nichtz gepunden Vnd da von das mein bruder pey mir lembtigen noch chain vnser erib nach vnser paider tod chain ansprach noch chain vordrung haben dar uber gib ich disen brief versiglten mit meinem insigel dem gotzhaws ze einem vrchund fur alle chrieg Des sind gezeug her Reicher vitztumb von der Rot Chunrad von Rotenburch der Morholtinger richter datz Oting Chunrad von Heltenperg Chunrad der scherig Ortel des abbtz chnecht vnd ander erberig zeug genueg Der brief ist geben datz Zangwerich do von Christi gepurd waren drewzehen hundert jar vnd in dem vierden jar darnach an sand Gregorien tag