Charter Document - 02520347

Ich Chunrat Rudolf sun von Talhaim vnd Eit sein muter vnd Margret Elzbet Mehthilt Wendel verjenen vnd tun chunt allen den die disen prief lesent oder horent lesen daz wir ze ainsgigen von vnser nohtichait haben geben ze chaufen dem ersam apt Vlreihen vnd sinem gotzhaus zwo hub datz Frvmansod mit allem dem daz da zu gehort besuechtz vnd [vn]versuechtz swi iz genant ist vnd ainen acher datz Mitterhulgen den der maier pauwet von Gutendorf vnd zehen zehent haus dev wir mit samt den oben gescriben huben heten ze rehten lehen von dem gotzhaus ze Raitenhaslach Da zu vergih ich Chunrat vnd mein muter vnd mein swester daz wir sei gestanden von allen den ansprachen vnd chrigen die wir heten oder ie gewnnen hintz dem gotzhaus datz Raitenh[aslach] swi den was vnd ze voderist von der ansprache vmb daz gut datz Mitterhulgen daz meinen herren von Raitenhaslach etzleich jar inn habent gehapt dez wir schaden haben genomen Wir veriehen auh vmb ein wis pei Dorfen daz wir dev auh haben ze chaufen geben dem oft genanten gotzhaus ze Raitenhaslach ze rehten aigen Wan an allem dem daz wir verchauft haben als oben ist gescriben vnd allez daz wir noh haben auf der erd daz haben wir allez ze lehen von dem gotzhaus ze Raitenh[aslach] Vnd daz der red vnd dem chauf also sei vnd auh immer stet beleib vnd [vn]zebrochen da vber so hab wir gepeten vnsern herren hern Ortlieb von Wald daz er disen prief hat versigelt mit seinem insigel ze einem waren vrchund Dez sint zeuch Ch[unrat] Ot vnd Hadmar die Talhaimer Epp von Puech Ruger von Guffelhaim Wernher von Aichen Frid[reich] der Tarm Epp an Stegen Ortlieb dez chelner kneht Frid[reich] Chrispelsteter H[ainreich] Gwiker H[ainreich] Tren Vlsch[alch] von Schonperch Ot von Chopel Der prief ist geben datz Trosperch do von Chritz geburt waren drevzehen hundert jar vnd in dem vierden jar da nah an sand Gregorin tach