Charter Document - 02520346

Ich Engelbreht von Teching vnd Periht mein hausfrauw verjehen offenbar vnd tun cbunt allen den die disen prief lesent oder horent daz wir vnd alle vnserev chint H[ainreich] Ch[unrat] Hertneit Popp Ott Frid[reich] Eit Levkart Elzbet Katerei Christein Ludmey vnd Agnes vns haben verzigen vnd sein gestanden gar vnd gentzliech von allen den rehten vnd von allen den ansprahen die wir heten an der od datz Wizentzhart die mein vater Ott von Torring het gesetzet Ruprehten vnd Leutolden von Imzing vmb sezehen pfunt pfenning vnd wan die vorgenanten Imzinger dev selben sehzehen pfunt heten gegeben hintz Raitenhaslach ze rehten selgret do hat der ersam apt Vlr[eich] von Raitenhaslach mir vnd meinen chinden geben sehzich vnd vier pfunt daz wir vns verzigen haben vnd wan etzlei[chs vnser chind ni]ht in dem lant waren so hab wir vnsers vreien aigens vnsern hof datz Nustorf gesetzet ze einen furpfant so si erst ze lant chomen daz si sich ze Raitenhaslach suln verzeichen gesehe dez niht swaz ansprache oder chriech do von daz gotshaus wrt angeent daz sol daz gotzhaus Raitenhaslach haben auf dem hof datz Nustorf Vnd daz dev vorgenant od datz Wizentzhart ewichleich bestee vnser frauwen vnd dem gotshaus datz Raitenhaslach mit allem dem da zu gehort besuechst vnd vnversuechst als oben gescriben ist so haben ze einer pesserr bestetigung erworfen mit vlig vnd grozzer pet wan wir niht aigens insigels heten daz her Ludweich der Grans her Chunrat von Teusenperch vnd Ch[unrat] der Vogler rihter ze Traunstain ir insigel habent geleit ze einem waren vrchunt aller diser sache Dez sint gezeug Frid[reich] von Hallerpruk H[ainreich] pei Chrevtel Vl[reich] der Swer Vl[reich] Vngelt H[ainreich] der Tren Seifrid von Chraymos Vl[reich] von Holtzleiten Frid[reich] von den Swaben H[ainreich] von Nustorf Ortlieb des chelners kneht Seibot Zingk Der prief ist gegeben datz Raitenhaslach do von Christz geburt waren drevzehen hundert jar vnd in dem vierden jar da nah dez mitichens ze mitterr vasten