Charter Document - 02520340

Wir Hainreich vnd Eberhart von Harskirichen verjehen offenbar daz wir durih vnser frauwen willen vnd durih vnser vodern sel willen vnd auh vnsers selbs hail vnd seid vns verpfligt haben mit solhem gelub hintz dem ersam apt Vireichen vnd hintz seinem gotzhaus ze Raitenhaslach daz wir paide vnd vnser paiden erben vnd nahchumft immer mer ewichleichen suln leihen den zehent dez dorfs datz Harpollen an alle widerred vnd an allen schaden irs gotzhauss leuten swelich sie vns antwrten vnd da von so hab wir den selben zehent verlihen Ch[unraten] von Taiting Vasolten von Maierhof Rugern von Westendorf Ortlein dez aptz kneht also daz si in dem gotzhaus ze Raitenh[aslach] pehalten an schaden vnd also suln auh vnser paider nahchum immer ewichleich tun Vnd dar vmb daz daz selgret vnd der gewerift dem gotzhaus iht gechremcht wert oder zebrochen wert so hat der ersam ritter her Reicher der vitztum von Rot vor dem der gewerift ist geschehen nah vnser vlig vnd grozzer pet sein insigel mit samt vnsern insigel gelegt an disen prief ze einem waren vrchund Dez sint gezeuch her Hainr[eich] von Sweiber her Ortneit der Tuntz her Ch[unrat] der Retenpechen her Ottel von Wald her Albrecht von Truchleiching her Albreht von Neunkirichen Dietpolt von Sweiber Eberbein der Westerkiricher der Diethtreichinger Meingoz Fridel der marstaller Vl[reich] von Rorech Ch[unrat] der scherg von Oting Gerunch der chammerer vnd ander zeug genuch Der brief ist geben datz Oting do von Christ geburt waren dreuzehen hundert jar vnd in dem dritten jar danah dez suntags nah vnsern frauwen schidung