Charter Document - 02520339

Ich Fridreih von Spitz tun chunt vnd vergih an disen prief offenbar allen den die disen prief sehent oder horent lesen daz ich vnd mein vater Frid[reih] der Spitzer dem got muez genaden daz Trugaerihs aigen datz Wainfurt haben vnser frauwen geben hintz Raitenhaslach mit allem dem daz da zu gehort versuecht vnd vnversuecht vnd haben vns se[in] also verzigen daz hin nach dhain vnser erb dar nah chrigen sol wan iz vnser vreiz vnd ledigs aigen ist gewesen ledichleich an [alle ansprach Di]tz selgretz sint gezeug Ott der Lamp Frid[reih] sein bruder Ch[unrat] der Gerr Vl[reih] der Chatzpech Dietlein der Ma[rstaller Da vber hat m]ein vater vnd ich mit gancer andaht vnd durih got an mein herren von Raitenhaslach gegert v[nd erworfen] daz [si vns] raichen sulln swo daz ist da wir sterben inner lanst mich vnd mein muter vnd mein hausfraufwen vnd mein swester vnd auh mein erben die sein gerent Vnd daz daz als also stet vnd [vn]zebrochen beleih da [vber so] gib ich disen prief mit mein insigel vnd daz dise steticheit dazster vester sei vnd dezder ewiger hat [mein] herre her Fridreih von Torring durih mein vlig vnd durih mein pet disen prief versigelt mit sinem insigel zu s[ampt] dem meinen Der brief ist geben datz Ditmanning do von vnserez heren geburt waren drevzehen hundert jar vnd in dem dritten jar da nah dez samtztags in den pfintzten