Charter Document - 02520338

Ich Nycolay von Amprang tun chunt allen den die disen brief lesent oder horent daz ich allez daz reht daz mich vnd mein muem Leukart die Schonsteterinn angehort von rehter aigenschaft swi daz genant ist an den aigen datz Wizentzhart vnd ze Ertgrub besuechot vnd vnbeschuechot han gegeben vnser frauwen vnd dem ersam apt Vlreihen vnd seinen gotzhaus ze Raitenhaslach ze rehten selgret fur vreiz vnd ledigs aigen vnd pint mich dar zu swaz dem vorgenantem gotzhaus chrieg oder ansprach aufgesteunden oder angiengen von meiner mumen Leukarten oder von dhainem ir erben daz ich daz auz rihtich mache vnd ze ledigen sol dem gotzhaus an allen schaden vnd wil auh dez selben aigens dez gotzhaus herr vnd gewer sein allez ich von reht sol sein meins selgretz fur alle ansprache Da wider hat mir der ersam apt Vlr[eih] vnd sein sammung geben bruderschaft vnd tail aller der guten ding die vnserm herren ewichleichen werdent erpoten vnd habent mir gelopt swenn daz ist daz got vber mich oder vber mein hausfrauwen gepeut daz si vns raichen sullen swo daz geschiht in ainer tagwait vnd sullen vns der erd enpfelhen Vnd daz daz alles samt also stet beleih vnd vnzebrochen gib ich disen prief versigelten mit meinem insigel ze ainem waren vrchund Diser sache sint gezeug bruder vnd munich herr Fr[idreich] der chamerer her Hainr[eich] von Matzse Ch[unrat] der Vogel Ainweich von Wazzerburch Gebh[art] der Chlapp her Lienhart her Vlr[eih] der pfarrer von Halsbach vnd her Vlr[eih] sein verweser vnd auh Vlr[eih] von Hallerprvkk H[ainreich] der Smerbech H[ainreich] der Gwikker Ortel des aptz kneht Tanchwart dez Amprangers kneht Fr[idreich] der Darm vnd ander erbig gezeug genuch Der brief ist geben ze Raitenh[aslach] dez jarez do von vnsers herren geburt waren dreuzehen hundert jar vnd in dem dritten jar dar nah dez nehsten erigtags nah sand Georin tach