Charter Document - 02520337

Ich Nycolay von Amprang vergih offenbar vnd tun chunt allen den die disen brief lesent oder horent lesen daz ich durih got vnd durih meins vater sel willen vnd aller meiner voruodern han gegeben vreileich vnd ledichleichen ze rehten selgret vnser fraun ze Raitenhaslach vnd der sammung da selben allez daz daz ich het vnd daz mir zu gehort an den guten datz Wizzentzhart vnd datz Ertgrueb Vnd wan mein muem frauw Leukart die Schonsteterinn ze Wazzerburch allez vil rehtz het als ich vnd geleichen tail mit mir an den vorgenanten guten han ich den selben tail auh gegeben mit samt dem meinen alsam ze rehtem selgret dem vorgenantem gotzhaus mit allem dem daz da zv gehoret beschuecht vnd vnbeschuecht swi iz genant ist Ich vergih auh daz ich meiner muemen irn tail wider legen sol vnd sol hintz ir vnd hintz ir erben dez gotzhauss ze Raitenhaslach herre vnd gewer sein fur all chrieg vnd fur all ansprache die daz gotzhaus dar vmb angeent von meiner muemen oder von ir chinden also daz wir nimmer mer dhain ansprache noh dhain vingerzaigt dar nah haben oder gewinnen sunder daz iz fur ledigs vnd vreiz aigen beleih dem gotzhaus an all widerred Vnd daz daz selgret vnd dev red als vorgescriben ist stet beleih vnd [vn] zeprochen da vber gib ich dem gotzhaus ze Raitenhaslach disen prief bestetigten mit meinen insigel ze einem waren vrchund Diser sache sint gezeug her Vlr[eich] der pfarrer von Halsbach her Vl[reich] sein verweser Hainr[eich] der Smerbech Vlr[eich] von Hallerprvk Hainr[eich] der Gwikker Ortel dez aptz kneht Tanchwarcht dez Amprangers kneht bruder Fr[idreich] der chamerer bruder Gebh[art] bruder Ainweich bruder Ch[unrat] der Vogel bruder Lienhart bruder Hainr[eich] der Matzseer vnd ander erberig zeug genuch Der prief ist geben ze Raitenh[aslach] dez jarez do von vnsers herren geburt waren drevzehen hundert jar vnd in dem dritten jar da nah dez nehsten erigtags nah sand Gerigen tach Daz ist geschehen pei dez ersam aptz Vir[eich] zeiten