Charter Document - 02520335

Ich Ortlieb vnt mit mir mein bruder Hainr[eich] von Hag verjehen vnt tun chunt allen den di disen brief horent oder lesent daz wir baide vns verzeihen durch got vnt durch vnser frawn willen vnt durch vnser sei hails willen vnt auh durch di beschaidenhait dez erwerigen herren abt Vlreichs vnt seiner samnung von Raitenhaslach aller der ansprah di wir gehabt haben vmb Haunolting swaz si do habent vber al vnt halt gaentzleihein aller der ansprah oder chriegs den wir do oder anderthalban hintz dem vorgenantem gotshaus ze Raitenhaslach oder hintz sinen levten oder gut mit reht oder mit vnreht ie gehabt haben vns lavterleihen verzeihen vnt verzigen haben durch di lieb vnsers herren Vnt daz furbaz dem selben goteshaus Raitenhaslach dehain chrieg oder ansprah von vnsern nahchomen oder frewnten vmb dehainerlai sahh icht ensei geben wir in disen brief verinsigelt vnt gestetigt mit vnserm insigel Dez sint zevkhe her H[ainreich] der custer vnt subprior her Wernhart der alt custer her Ch[unrat] der brudermaister her Vlr[eich] der Gruntner her H[ainreich] der Huter bruder ze Raitenh[aslach] Ortlieb Wilhalm dez abtes kneht Wilh[alm] der choh Ortlieb dez chelners kneht Diser brief ist geben ze Raitenhasl[ach] do von Christes burt waren tausent drew hvndert vnt drew jar an dem heiligen oster abent