Charter Document - 02520334

Wir Levtolt von Chvnring schench in Osterreich verjehen an disem brief vnd tvn chvnt allen den di disen brief sehent oder horent daz Fridereich Hevnel vnser diener hat gegebn sein gvt datz Wedling ze chaufen dem ersam herren apt Vlreichn vnd dem gotshaus ze Raitenh[aslach] vmb zwai vnd vierzich pfunt pfenning Wienner mvnzz vnd wan daz selb gvt von vns lehen was so hab wir durch got vnd durch vnserr voderr sei willen vnd durch vnser selbs hail vnd seld vnsern willen da zv geben vnd habn di aigenschaft vreilighen gebn vnd aufgeselt vnser vrowen vnd dem gotshaus ze Raitenh[aslach] mit alle dem daz dar zv gehoret swi daz genant ist gentzlichen mit gvtem willen vron Agnesn vnserr hausvrowen vnd vnserr svn Jansen vnd Hadmars also daz dehain vnser erb noch Fridreichs Hevnels erben dehainer immer mer dehain reht noch dehain ansprach noch vingerzaig nach dem vorgenantem gvt datz Wedlingn sullen noch mvgen habn noch gewinnen svnder ez sol daz selb gvt ze Wedling sein ewichleichn vreiz vnd ledigz aign vnser vrowen vnd des gotshaus ze Raitenh[aslach] an alle widerred aller vnserr erben Vber daz allez so setzet dannoch Fridreich Hevnel seinen Weingarten Smalaz ze Minnpach mit vnserr hant wan er vns ze purchreht zwen pfenning da von geit ze einem fvrpfand vnd ze einer ebentevr dem gotshaus ze Raitenh[aslach] fvr alle di chrig vnd ansprach die daz gotshaus ze Raitenh[aslach] vmb daz gvt ze Wedling mvgen angen die in ze reht angehorent ze ledigen vnd ze losen Vnd daz der chauf vnd der gewerft dem vofgenanten gotshaus werd behalten vnd ewichleichen stet beleihe vnd vnzebrochen da vber hab wir paid vnserev insigel gelait an disen brief ze ainem waren vrchvnd Des sint zevg her Levtolt von Chvnring her Alber von Chvnring her Hadmar von Chvnring her Chun[rat] von Potendorf her Arnolt von Tobran her Arnolt von Praunstal Ortolf Hevnel her Hilprant vnd her Ainweich brvder vnd mvnich ze Raitenh[aslach] vnd anderr zevg genvech Der brief ist geben datz Tiernstain do von vnsers herren geburt waren drevzehen hvndert jar vnd in dem dritten dar nach an sand Matheis tag