Charter Document - 02520332

Ich Chunrat Tehser vnt wir Hainreich vnt Chunrat sein svn offen vnt tun chunt allen den di disen brief lesent oder horent lesen daz wir alle drei haben geben vnser vreiz aigen vnt vber al swaz wir heten datz obern Hafnarn daz mich von meiner erern hausfrawen angevallen waz der vorgenanten kneht muter der vreiz vnt ledigs aigen iz waz vnser frawn vnt der samnung ze Raitenhaslach ze rehtem selgret mit allem dem daz da zv gehort besucht vnt vnbesueht ze holtz vnt ze velt ze haus vnt ze wismat swi iz genant ist vnt haben daz selbe aigen als vor geschriben stet auf geselt auf vnser frawn alter dem gotshaus ze Raitenhaslach ze bleiben ewichleich an rehtes aigens stat Wir veriehen auh offenbar daz wir alle die chrieg vnt ansprach di wir ie gewnn hintz dem offt genantem gotshaus swi die waren sleht oder vnsleht die wir doch emaln auh lazzen heten vnt verschriben vnter hern Ortliebs insigel von Aschauwe in derselb uerrihtung wir auh warn gestanden vnt auh nu an der stund gesteen von der ansprahe di wir heten von vnser swester wegen vnt ir chint vmb daz aigen datz Garlosing daz wir noh si dar nah furbaz niht schuln noh mogen gesprechen wan wir noh si dar an dehain reht haben Wir haben auh gegeben vnt gelobt dem ersam abbt Vlreichein von Raitenhaslach in sein hant daz wir di vnminn vnt die veintschaft die wir heten vmb Chunraten den Chrispelsteter vnser swester wirt hintze Brentlein aus dem Leuchental also daz wir lauterleiehein vnt turnehtichleichen sein frewnt sein worden vnt im furbaz gern dienen ob er ez an vns vodert vnt sueht Unt wan mein sun Hainreich vnt Chunrat sich genaigten vnt sich so liebleich mit dem vorgenanten ersam abt Vlreichein habent vermint vnt gentzleichein verslihte hat der abt von sein trewen vmb di sahhe alle meiner tohter geben ein plaben mantel vnt ein mut chornes vnt Chunraten meinem svn ein phunt phenning vnt zwelf metzen chorns vnt da zv vns allen drein drei saitze roche Unt daz daz selgret vnt die sahhe alle als oben geschriben ist von mir Chunraten dem Tehser vnt von meinen svnen Hainr[eich] vnt Chunraten stet vnt vnzebrochen beleih wan wir aigens insigel niht enheten so haben wir dise hantvest versigelt vnt bestetigt mit hern Ortliebs insigel von Aschauwe der vns daz durch vnser vlig vnt groz pet willichleichein hat geliehen an disew hantvest zv einem waren vrchunt Diser sahhe aller sint gezevch her Ilsunch der prior her Vlreich der Gruntner her Chunrat der Wienner her Ott der Sahs her Geb[hart] der Chalb her Ainweich von Wazzerpurch her Hainreich der Hvter der disew hantvest hat geschriben bruder vnt munich ze Raitenhaslach her Vlr[eich] der pharrer von Halspach der Rorer von Aufhausen hern Jansen sun von Ror Chunr[at] der Auwer rihter ze Mermos Gebolf der Strazperger rihter ze Marchartstain Fridr[eich] der Chriespelsteter Frid[reich] der probst von Zeidlorn Eberh[art] von Hafnarn Engelpreht von Herpholtzhaim Ch[unrat] von Stadlarn Ortel Wilhalm H[ainreich] Puehs dez abts knehte von Raitenh[aslach] vnt ander erwaerig zevg mer Disew hantvest ist geben ze Raitenhaslach do von Christes burt warn vergangen tausent vnt drew hundert jar darnah in dem anderm jar an sant Laurentii tag