Charter Document - 02520328

Wir der rat vnd deu gemain der purger ze Stain tun chunt allen den di disen brif ansehent vnd horent lesen daz fur vns ist chom her Fridrich der Ruschel vnser purger vnd hat vor vns vergehen daz er hab einen paungarten in der awe bei der chirchen von dem gotshaus ze Raitenhaslach ze rehtem purchreht ze dreihzz pfenning vnd zeinem halben pfunt zins vnd daz selbe purchreht du dreihzz pfenning di sol er geben alle jar an sant Mychels tage vnd daz halpfunt zins an sant Merteins tage dar nach vnd swen er daz selb purchreht niht geb an dem vorgenanten tage so sol wandel dar auf gen als purchrehtes reht ist vnd swen er den zins auch niht gebe an dem tage der uor benant ist swer den hofmaister ist in Raitenhaslaher hof der sol fur denselben zins auf dem vorgenanten aygen pfenten mit seinem gutem willen vnd swen der uor genant Fridrich seinen holden auf daz uorgenant aygen Stift oder sezzet tut der dehayn vnzuht da sol uor dem uorgenanten hofmaister vmb geschehen swaz reht ist vnd sol ouch daz purchreht vnd der uor genant zins weder mit steur noch mit dehainem dwanchsal niht gemert werden von gotshaus vnd von dem hofmaister als e benant ist daz her Fridrich vnd sein hold auf dem gut furbaz an schaden beleiben Daz der rede also sei vnd furbaz niht verchert werde da geb wir disen brif vber mit vnserm insigel zeinem vrchunde Diser brif ist geben do von Christes gepurt was tausent jar dreu hundert jar vnd ayn jar an vnser fraun tage ze der liehtmiss