Charter Document - 02520326

Ich Friderich von Torring tvn chunt allen den di disn brief lesent oder horent daz ich des tages vnd man meinen prvder herrn Jansn datz Raitenh[aslach] ze der erd bestatt han gebn nach seinem gescheft vnd nach seiner pet meines vnd seines vrein aigns den hof datz Herpholtshaim mit alle der ansprach vnd wir dar auf heten vnd mit alle dem daz da zv gehoret svecht vnd vnbesvechet vnser vrowen vnd dem gotshaus ze Raitenh[aslach] fvr aign vnd ze rehtem selgeret mit solher beschaidenhait swann meins hern Jansen jartach ist daz man der samnvng ier pfrvnt an wein vnd an vischen vnd an prat pezzer vnd seinen jartach mit dem ampt vnd mit alle dem rainen pet bege da zv so bin ich gestanden durch meiner sel hail von dem chrieg den ich vnd mein prvder her Jans heten an der vogtai datz Lohen vnd han daz vorgenant selgeret mit aller ansprach fvr mich vnd fvr meinen prvder aufgeselt auf vnser vrowen alter datz Raitenh[aslach] Auch habnt zv mir gelobt her Albreht von Vberechn vnd Chvn von Imzing daz meines prvder chint daz gescheft vmb die vogtai stet hab Daz auch daz vorgeschribn selgeret vnd gescheft immermer stet behalten werde gib ich disen brief mit meinem anhangentn insigel ze vrchvnde vnser vrowen vnd dem gotshaus ze Raitenh[aslach] Des sint gezevg her Wernh[art] von Gehai der pfarrer von Vberechen her Albreht her Weichart vnd her Ott her Chalhoch der Zvkswert Christan von Tetelhaim Hainreich der Noppinger Vlreich der Lampotinger Chvn von Imzinge Wernh[art] Paul di Zvkswert Fridreich der Perger Ch[vnrad] der Shurre Ch[vnrad] der Vreioltsmoser vnd sein svn Wernh[art] vnd ander erberig gezevg genveg di daz horten vnd sahen Diser brief ist gebn do von Christ geburt waren drevzehen hundert jar vnd in dem ersten jar darnach an sand Vincencen tag