Charter Document - 02520325

Ich Hainreich von Ror vergich offenbar vnd tvn chvnt allen den di disen prief sehent oder horent lesen daz ich mit miner havsfrawen willen dev aigenshaft ze Tal vnder Zeilarn vnd ze Vrvar di mein rehtez aigen gewesen sint vnser frawn vnd [dem convent] datz Raitenhaslach avf vnser fravn alter ze rehtem selgere[t d]vrich got vnd dvrich dev andacht dev ich vnd alle mein vorvodern [zv dem] gotzhavs haben gehabt ledigleichen mit allem minem reht svht vnd [vnver]shvt gegeben han vnd wil der selben aigensheft jar vnd tag gewa[er] sein als rehtes selgeretes Vnd daz daz vnser frawn vnd dem gotzhavs ze Raitenhaslach stet vnd vnzebrochen beleih gib ich in disen prif ze ainem waren vrchvnd mit minem insigel Diser prief ist gegeben vnd geshriben ze Raitenhaslach do von Crists gebvrt weren tavsent jar vnd drevhvndert jar an sant Katrein tag