Charter Document - 02520324

Ich Oertlieb von Wald vnd mein sun Chunrat vnd ander menev chint vnd mein havsfravwe Sophei tvn chunt vnd verjehen an disem prief alle den di den ansehent vnd horent lesen di heut sint vnd noh chunfdinch sint daz ich vnd di vorgenanten di vor verschriben sint haben gegeben mit vnserm gutem willen vnser reht aigen drei hove ze Polling versuht vnd vnversuht Vlreichen dem Tanner von Muldorf vnd puriger da selben sein erben vnd seiner havsfravwen Diemvten vur reht aigen vmb zwai vnd sibenzich phunt Regenspuriger phenning dez sint zwai phunt leichavf ains meiner havsfravwen Sophein vnd daz ander meinem svn Chunratem vnd schulen dez vorgenanten aigen gewer sein dez vorgenantem Vlreichen dez Tanners von Muldorf seiner havsfravwen Diemvten vnd seiner eriben als man von reht gewer schol sein rehtes aigens vnd als dez lanst reht ist zehen jar vnd mer Vnd swie tan handhvng er der vorgenant Vlreich der Tanner vnd sein eriben da mit tvnt daz ist vns lieb vnd haben vns dez selben aigens also verzigen mit vnserm gutem willen Vnd di vorgenant hof ze Polling sint also genant der erst da maier Scher aufist der ander pei der prukke mitten in dem dorf ze Polling der dritte da Wolf her avf ist vnd swaz dar zv gehort ze holze vnd ze veld versuht vnd vnversuht Der red vnd der sahe ist zevg der herre Oertlieb von Aschavwe der herre Oertlieb der Wolcher Hainreich der Chiemperiger der herre Ekgolf von der Wort der herre Charle der Nevwenchiricher Hainreich der Pollinger Seibot von Polling Chunrat der Voricher Friderich der Munichauser Friderich der Wolfoltinger Hainreich der Puchpech Oet Vberacher Chunrat der Rauter Hainreich der Resche Hainreich sein svn Peter der Pehaim Chunrat der Huber Ditmar der Huber Peter dez Pehaims aidem Chunrat von Polling vnd ander vrum laut Vnd daz der chauf vnd di sache vnd di vurziht an dem gut stet vnd vnzeprochen peleib dar vmb leg ich Oertlieb von Wald ze rehter stet mein insigel an disen prief Daz ist geschehen in dem jar do tausent vnd trev hundert jar wes von Christes gewurt vnd der prief ist gegeben ze Troestperch dez suntages do man zehen tag het gevast