Charter Document - 02520323

Ich Hainrich von Hoholting tun chunt allen den die disen brief ansehent oder horent lesen daz ich durch got vnt durch meiner sei hail mein reht aigen do dehain mein bruder noch ander niemen dehain reht an habent daz sint zwo hub datz Cholbach der samnung vnt dem gotzhaus datz Raitenhaslach han gegeben ze rehtem selgret mit allem dem daz dar zv gehort holtz velde wismat wazzer gesuht vnt vnuersuht mit sotanem gedinge daz nach minem toet aller der dinst der do gehort von den zwain huben datz Cholbach sol gegeben werden ewichleichein an den zwain tagen vor dem aschtag daz ist an dem mentag vnt an dem erigtag vnt an dem palmtag vnt an den nehsten drein tagen dar nah daz ist an dem mentag vnt an dem eritag vnt an der mitichen vmb viesche Vnt swaz vber wirt daz sol man an ander vastagen geben Si suln auch von dem vorgenanten gut alle jar dreizich phenning Regensburger hintz Salmansweiler geben Geschech aber daz daz ditz gescheft vnt disev gutet der sammung von Raitenhaslach als oben geschriben ist niht wrde behalten gar vnt gentzlichen so sol daz selbe jar swenn man iz versaumt der vorgenant dienst von Cholbach gar vnt gentzlichen gegeben werden hintz Salmansweiler Vnt ze einem waren vrchunde han ich Hainrich von Hoholting sev in nutze vnt in gwer bi mir lebentigen gesetzet vnt han in di zwai gut von Cholbach aufgegeben auf der schrann datz Purmansgwikk offenleichen Vnt dar vmb daz man wizze vnt erchenne daz si bei mir lebentigen sein gesetzt in nutz vnt in gwer gib ich in di weil ich lebe sehtzich phenning Regensburger vmb viesch an dem palmtag der sammung vnt hintz Salmansweiler dreizch phenning Regensburger Diser rede vnt diser sahhe sint gezevch der tehhent von Zeidlorn der Weilberger Albelin von Zimbern von Altenburch Wernhart Visler Chunrat Gruber Chunrat dez Sahsen aidem Goltzstain von Purmansgwikke Chunrat vnt Virich von Butting Rudger aus der Turten Rupreht ir probst vnt ander erwerig levt Vnt daz disew sahhe stet beleihe gib ich in disen brief versigelt mit meines herren dez erwerigen hern vnt abtes Vlreichs von Salmansweiler insigel vnt meines heren Hainreichs dez graven von Leonberch insigel vnt meiner frawn Agnesen siner muter insigel wan ich selben niht insigels han Diser brief ist geben do von Christ geburt waren tausent jar vnt drew hundert jar