Charter Document - 02520322

Wir bruder Friderich der abbt ze Raitenhaslach tun chund allen den die disen brief ansehent oder horent lesen daz her Hainreich von Hoholting durch got vnd durch siner sel hail sein reht aigen da chain sein pruder noh ander niemen chain reht an habent daz sint zwo hvb datz Cholbach vns vnd vnserm gotzhavs her ze Raitenhaslach hat gegeben ze rehtem selgret mit allem dem daz darzv gehort holtz veld wismat wazzer gesuht vnd vnversuht mit sotanem gedinge daz nach sinem tode hern Hainreichs von Hoholting aller der dienst der gehort von den zwain hvben datz Cholbach sol gegeben werden ewichleichen an den zwain tagen vor dem aschstag daz ist an dem mentag vnd an dem eritag vnd an dem palmtag vnd an den nehsten drein tagen dar nach daz ist an dem mentag vnd an dem eritag vnd an dem mitichen vmb vische Vnd swaz vber wirt daz sol man an andern vastagen geben Wir svln auch von dem vorgenanten gvt alle jar dreizich phennig Regenspvrger hintz Salmansweiler geben Geschech aber daz daz ditz geschefft vnd disev gvtat vnser sammung hie ze Raitenhaslach als oben geschriben ist niht wrd behalten gar vnd gentzlichen so sol daz selbe jar swenne man iz versavmt der vorgenant dinst von Cholbach gar vnd gentzlichen gegeben werden hintz Salmanswiler Vnd ze einem waren vrchvnd hat der oftegenant her Heinrich von Hoholting vns in nutz vnd in gewer pei im lemtigen gesetzet vnd hat vns di zwai gut von Cholbach auf gegeben auf der schrann datz Purmansgwikk offenlichen Vnd dar vmbe daz man wizze vnd erchenne daz wir pei im lemtigen sein gesetzet in nutz vnd in gwer geit er vns di weil er lebt sehcich phenning Regenspurger vmb vische an dem palmtag vnd hintz Salmansweiler dreizich phenning Regenspurger Diser rede vnd diser sach sint gezevch der techent von Zidlarn der Weilberger Aebbelin von Zimbern vone Altenburch Wernhart Visler Chvnrat Geruber Chvnrat des Sahsen aidem Goltzstain von Purmansgwikk Chvnrat vnd Virich von Butting Ruger auf der Tvrten Rupreht vnser probst Hainrich von Tremelshoven Perhtold von Ode vnd ander erberig leuit Vnd daz disev sache stet beleihe geben wir im disen brief versigelt mit des edeln herren Heinrich graven von Lewenberch insigel vnd mit vnsers herren insigel des abbtes von Salmansweiler vnd mit vnserm insigel Diser brief ist gegeben do von Christ geburt waren tausent jar drev hvndert jar