Charter Document - 02520318

Wir Ortlieb von Wald Ditmar der Sultzbech Hainr[ich] der Puecbech Hainr[ich] der Ahmanner Hadmar der Talhaimer veriehen offenbar vnd tun chund allen den die disen brief lesent oder horent lesen dar wir alle mit ainander haben gelopt mit vnsern trewen vnd mit dem vrchund ditz briues vnd ze voderist ich Ortlieb von Wald daz wir wellen vnd sullen reht oder minn tun allen den die dhain ansprach heten hintz herm Engelbreten von Haiding dem got muez genaden vnd hintz seinen erben dez tags do er verschied von diser welrt vnd ze voderist geloben wir daz wir vnd doh besunderleichen ich Ortlieb von Wald daz ich minn vnd reht last vnd toi vmb all die ansprach die mein lieber herre der ersam pihscholf von Salczburch vnd dar nah Christan von Chnosing habent hintz dem vorgenanten Haidinger vnd hintz sinen erben daz ich da vmb willichleichen wil tun meinen liebem herren von Saltzburch minn oder reht swelhes er wil Wir geloben auh mit vnsern trewen alle vnuerschaidenleichen daz wir lasten min vnd reht ob iemen ist oder wer der gehain ansprache hat oder gewint hintz der ersam abt von Raitenhaslach vnd hintz seinem conuent daz sie den Haidingern habent der erd bestatt vnd begraben daz wir den selben chlagern suln tun aller ding minn oder reht vntz in daz reht gescheh Vnd daz der red vnd dem gelub also sei vnd daz wir auh behalten swaz oben geschriben ist gar vnd gentzleich da vber so gib ich Ortheb von Wald disen brief versigelt mit meinen insigel ze ainem waren vrchunt Der brief ist gegeben do von vnseres herren geburt waren tausen jar zwai hundert jar in dem nevn vnd nevnzigistem jar dez nechsten suntags von sand Gilgen tach