Charter Document - 02520317

Ich Ekhart purger ze Ditmanning verich offerbar vnd tun chund allen den die disen brief lesent oder horent lesen daz ich mein vreiz vnd ledigs aigen datz Chregling han gegeben herrn Hainr[eich] dem guster vnd dem gotzhaus ze Raitenhaslach vmb zehent pfunt Saltzburger also daz daz gotzhaus datz Raitenhaslach daz selb gut datz Chregling immer mer sol haben vnd besitzen fur vreiz vnd ledigs aigen an all ansprahe vnd an allen chriech Ja halt daz diser chauf dester steter beleih vnd daz gotzhaus dester sicher sei fur alle ansprache dez selben gutez da vber setz ich dem selbem gotzhaus ze Raitenhaslach mein vnuerchummertz haus halbs datz Titmanning den cheller halben vnd halbs haus ze einem rehten furpfant daz ich dez selben gutz gewer sei als reht ist gemainleichen in der grafschaft Da vber vergih ich Ekhart daz der vorgenant guster vnd daz gotzhaus ze Raitenhaslach habent vier pfunt auf dem selbem halbem tail dez hauss daz ir furpfant ist also daz ich alle jar dem guster ze Raitenh[aslach] swer der ist ob her Hainr[eich] niht enwer daz ich dem selbem guster sol geben ain halb pfunt an sand Michels tach oder swenn ich daz verzichte daz ich iz niht geb so sol der guster daz selb halb pfunt slahen auf dev vier pfunt daz daz hapt gut ist Vnd daz daz als also stet beleih vnd der red aller ding also sei da vber so han ich Ekhart erworfen daz diser brief ist versigelt vnd bestetigt wan ich niht aigens insigels han mit hern Hainreiches insigel von Nopping des purchgrauen ze Titmanning vnd auh mit der stat insigel ze einem waren vrchunt Diser sahh sint gezevch her Hainr[eich] von Nopping mit seinem insigel Rupreht von Imzing H Ch Ot Frid[reich] die Lampes Fr[idreich] der Chrispelsteter Vl[reich] der Lampotinger Martern datz Titmanning Wernhart der Zuchswert Fr[idreich] der Spitzer Vl[reich] der Mulhaimer Fr[idreich] der Vihscher H[ainreich] der Smerbech Der brief ist gegeben datz Titmanning dez jarez do von Christez geburt waren tausent jar zwai hundert jar in dem nevn vnd nevnzichgisten jar an sand Gilgen tach