Charter Document - 02520316

Wir Ott vnd Stephan von gotes genaden pfallentz graven ze Reyn hertzogen ze Baiern veriehen an disem brief offenbar daz wir von dem erberen apt Fridrich vnd der samnvng ze Raitenhasleich enpfangen haben an bereitschaft hvndert pfunt vnd zwai vnd sehtzich pfunt Regenspurger pfenning vnd wan wir den selben apt vnd die samnung der pfenning an bereitschaft niht verrihten mohten haben wir in vnd ir gotshavs ze ergetzvng gegeben der awe datz Etnaw als der grabe get von dem berig entriht fvr die chelchahten pvchen vntz in die Saltza immer mer ze tal vntz an den graben der von alten dingen ein march ist gewesen ires alten wismates grvnt vnd holtz swaz da entzwischen ist oder swie ez genant ist versvht vnd vnversuht also daz daz vorgenant gotshavs ze Raitenhasleich daz obgeschriben tail der awe grunt vnd holtz ewichlich sol inne haben vnd nizzen an allen irresal fur vriez vnd ledigez aigen aller dinge als daz wismat daz ez niderhalb hat Daz in daz also stet belibe vnd vnzebrochen geben wir in disen brief versigelten mit vnseren insigeln Der brief ist gegeben ze Straubing do von Christes geburt waren tavsent jar zwai hvndert jar vnd in dem nevn vnd nevnzigisten jar an sand Lavrencii abent