Charter Document - 02520315

Wir Ott vnd Stephan von gotes gnaden pfallentz graven ze Ryn hertzogen ze Beiern veriehen offenber vnd tvn chvnt allen den di disen brief sehent oder horent lesen daz wir dem geistlichen vnd dem ersamen abbt Fridereich von Raitenhaslach siner samnvng vnd ir gothavs gegeben haben datz Halle vnsers vrein aigens zwo gantze pfanne mit allen den nvtzen vnd den rehten di dar zv gehorent besvcht vnd vnbesvcht swi ez benant ist vmb drev hvndert pfvnt vnd vmb sechtzik pfvnt Regenspvrger pfenning der si vns verriht habent nach vnserm willen an di stet da wir hin wolden also daz si di selben pfanne ewichlichen haben svln an twanchsal vnd an alle stiwer fvr ledigs vnd vreies aigen wan si deheinen chavf mvgen noch getvrren werben noch getvn da dehein twanchsal oder dehein reht avf weren Wir erchennen ovch den vorgenanten herren vnd ir gotshavse ze Raitenhaslach daz in der selben pfanne ainiv emalen gegeben waz von dem Tawerstain ze selgeret hintz Raitenhaslach vnd da von haben wir si dester willichlicher wider gegeben den vorverschriben herren vnd ir gotshavse ze Raitenhaslach Vnd wan dem gotshavse ze Raitenhaslach mit den zwain gantzen pfannen di pfenning niht gentzlich widerleit noch vergolten sint haben wir di sache bedenthalben gesetzet an vnser getrewen Ortliben von Wald Lvd[weig] den Grans Reich[er] den vitztvm von der Rot vnd an Hainr[eich] den jegermaister daz si sich ervaren svln mit einander waz wir dem vorgenanten gotzhavse geben svln des holtz datz Ettenawe da mit in widerleit werden di vorgenanten drev hvndert pfvnt vnd sechtzik pfvnt Vnd daz in daz selb in einem moneid avzgeriht vnd volfvrt werd an geverd dar vmb habent si sich in vnserem namen willichlich gebvnden vnser getrewen Vl[reich] der trvchsetz von Hailsberch Ekkpreht der Dravchbech Lvd[weig] der Grans vnd Reicher der vitztvm von der Rot vnd sint ovch borig worden daz wir in alle di chrieg vnd di ansprache di si an gent swie si genant sint allez dinges gaentzlichen avzrihtich svln machen Vnd daz wir in daz allez laisten vnd volfvrn als wir in gelobt haben dar vmb setzen wir in vnser wismat datz Ettenawe ze einem fvrpfande an allez geverd Wer aber daz wir in vnd ir gotshavse daz allez niht volfvrten vnd bestetigten in einem moneid als wir in geheizzen vnd gelobt haben so svln der vorgenant trvchsetz vnd der Dravchbech ze Regenspvrch an geverd laisten ob di monvng des abbtes vnd des conventes von Raitenhaslach da begreiffet ist des niht so svln si mit sampt dem Grans vnd dem vitztvm von der Rot ze Lantshvt in varen vnd in geyselweiz da laisten vntz daz wir alle di Sache avzrihtich machen als di hantvest sagt vnd swenn daz ist daz der ersam man brobst Meinhart von Bavmbvrch vnd sin convent vnd di sengel willichlichen gestent von den zwain pfannen vnd ir hantvest di si von vns dar vber habent wider gebent so sol daz vorgenant wismat ze Ettenawe mit sampt den borgen an alle Widerrede ledich sein Vnd daz in daz allez stet vnd vnzerbrochen belibe dar vber haben wir in dise hantveste gegeben versigelt mit vnseren insigeln Vnd ist daz geschehen ze Lantshvt da von Christes gebvrt waren tavsent jar zwai hvndert jar in dem newn vnd newentzigistem jar des nechsten tags nach dem svnnwenten tag