Charter Document - 02520314

Wir pruder Ott vnd Chvnrat van Leizze veriehen mit disem gegenburtigem prief daz wir mit vnser lieben muter vnd auch mit andern vnsern geswistriden mit gutem willen sein gestanden van allem chrieg den wir heten gegen dem erberen abtt Friderichen van Raidenhaslach vnd seinem gotshaus an allem dem gut versueht vnd vnuersueht datz Nevndorf mit sogetaner bescheidenhait daz si vnser vordem vnd auch vnser vnd vnser geswistreit sullen gedenchen immermer hintz got Auch der genant abtte Friderich vnd samnung habent vns ain lieb vnd ein minne getan vnd habent vns gegeben fvmf pfunt Wienner dar vmbe daz wir furbaz immermer niht alain an allem dem gut ze Nevndorf svnder an ander allem ir gut mit vnsern trewen iren frvm sulen meren vnd fudern vnd irn schaden wenden Daz hab auch wir gelobt mit gantzen trewen auf dem alter vnser vrowen datz Chrems in Raidenhaslacher hof Wan wir niht aigen insigel heten hab wir gebeten den erberen abtte Chvnraten van Wilhering der aller diser sache taidinger vnd ebner was daz er alle disev vorgeschriben sache hat bestetigt mit seinem insigel an disem gegenburtigem prief Dar vber hab auch wir gebeten hern Vlrichen van Wolfgerstorf den lantrihter der diser sache horer vnd rihter was daz er auch durch merar vestenung diser sache an disen prief sein insigel hat gehangen Des sint gezevg abbte Chvnrat van Wilhering her Alber der hofmaister van Raidenhaslach her Chvnrat der Wienner van Raidenhaslach her Hainrich der chelner in Raidenhaslacher hof pruder Chvnrat der hofmaister in Wilheringer hof Vlreich mein ohaim van Lengenvelde vnd ander frumeper vnd getrewer leut genueg Daz ist geschehen do van Christes geburde waren tovsent jar zwai hvndert jar nevntzich jar in dem nevnten jar des nehsten mitichens vor ostern