Charter Document - 02520313

Ich Fridreih von Praunauw vergih vnt tun chunt allen den di disen hrief lesent oder horent lesen das ich do mein hausfrauw frau Ofmey wart der erd bestatt der got muez gnaden datz Raitenhaslach an vnser fraun abent in der vasten han gegeben vreileihen vnt ledichleihen durih ir sei willen vnt aller meiner voderr sei hail vnt seid vnt der mein selbs mein vreis aigen datz Vberech auf dem perg dev mitterhub vnt han si aufgeselt auf vnser fraun alter ze der gegen aller sammung also mit beschaiderner red das ich die vorgenant hub sol haben vntz an meinen tot vnt sol ich vnser fraun ze Raitenhaslach alle jar geben dreizich pfenning ze einem vrchunt daz dev dikk genant hub daz gotzhaus ze Raitenhaslach sol ledichleichen angevallen an allen chrieg vnt sol man die pfenning geben alle jar an sant Michels tag Idoh wer daz daz ich erben gewinn so suln die selben erben vreiev chur haben ob si daz gut wellent haben vnt selb behalten so suln si daz vorgenant gut losen vnt ledigen mit zehen pfunt pfenning daz man mit den selben pfenning ein ander gut chauf vnser fraun Vnt daz daz also stet beleip vnt vnzebrohen da vber so han ich disen brief gegeben vnt versigelt mit meinen insigel ze einem waren vrchunt Diser sahhe sint gezuech her Vl[reih] von Frenching Frid[reih] der Vberecher Eberl der Chalp Vlschalih von Schonperch Ch[unrad] von Haid Vl[reih] der schuechster Der brief ist gegeben dez jares do von Christez geburt waren tausent jar zwai hundert jar in dem neun vnt neunzigistem jar an vnser frauwen abent in der vasten