Charter Document - 02520312

Ich Vlreih von Hallerpruk offen vergich vnt tun chunt allen den [di] disen brief ansehent oder horent lesen daz ich Vlreih von Hallerpruk han gegeben dev gut Chruzenpuhel vnt vor Od dev mein vreiz vnt legdigs aigen waren halbev vnt halbev meins bruder Chunratz von Hallerpruk vnt was daz selb tail mein Satzung vnt gab die vber tuwer mein bruder Chunrat vnser frauwen hintz Raitenhaslach ze selgret vnt dem ersamen abt Fridreihen vnt der sammung da selb do fure der vorgenant abt zu vnt legdigt dev gut datz Chruzenpuhel vnt ze vor Od vmb daz gut da iz mein satz vmb was vnt chauft der abt Fridreih dar nah ze hant mein tail an den diche genanten guten versuech vnt vnversuech swi iz genant ist also daz dev gut alles dings sint ledichleichen vnt vreileichen vnser frauwen vnt den ersamen abt Fridreihen von Raitenh[aslach] angevallen vnt han ich Vlreih von Hallerpruk vnt mein bruder Chunrat dev gut Chruzenpuhel vnt vor Od auf geseid auf vnser frauwen alter ze Raitenhaslach vnt habent sich auh vnser chint allev chnehte vnt junchfraun verzigen also daz si nimermer dhain reht noh dhain ansprah mugen gehaben noh geturren gehaben auf dev oft genanten gut Vnt daz der red also sei vnt daz dev gut furbaz ewichleichen besten dem gotzhaus ze Raitenhaslach an allen chrieg vnt an all ansprahh da vber so han ich disen brief gegeben dem vorgenantem gotzhaus versigelten mit meinen insigel ze einem waren vrchunt Diser brief ist gegeben dez jares do von vnsers herren geburt waren tausent jar zwai hundert jar in dem oht vnt neunzigisten jar an sant Marteins tag