Charter Document - 02520311

Ich Ott von Wald offen vnt tun chunt allen den die disen brief ansehent oder horent lesen daz ich dem gotzhaus ze Raitenhaslach han gegeben die aigenschaft die ich het an dem holtz in dem Pruntal daz halbes mein aigen waz daz Hainreih von Hub von mir het ze lehen der emalen daz selb holtz het gegeben ze selgret dem vorgenanten gotzhaus ze Raitenhaslach gentzleihen vnt gar allez daz reht daz er dar an het Vnt daz daz dikk genant holtz ewichleichen pestee dem gotzhaus datz Raitenhaslach vnt ich mich auh verzigen hab der aigenschaft auf halbem holtz in dem Prunntal da vber so han ich gegeben disen brief versigelten mit meinem insigel ze einem waren vrchunt Der brief ist gegeben ze Raitenh[aslach] do von vnseres herren geburt waren tausend jar zwai hundert jar in dem oht vnt niuntzigistem jar an vnser frauwen tag in dem habersnit