Charter Document - 02520309

Ich Ortlieb von Wald offen vnd tun chunt allen den die disen brief ansehent oder hornt lesen das Merbot von Herolczhaim hat geliehen acht halb pfunt Salczburger pfennig Ekharten von Tann dem Gelaimlein auf ainen hoff datz Sigharting der sein rechtz aigen was vnd auch frawnn Kathrein seiner hausfrawen morgengab was der got muess genaden Nu cham es da zu das der vorgenant Tanner den selben hoff datz Sigharting gab ze selgrat vnser frawn hintz Raitenhaslach des tags vnd man sein hausfrawn frawn Kathrein der erde enphalich der morgengab er was vnd solt in auf auf frawnalter ze Raitenhaslach er vnd sein vater her Ekhart von Tann vnd Ekhart der Rorer sein bruder mit sogetanem geding das die sammung datz Raitenhaslach solt dem Herolczhaimer geben sein pfennig do man do wolt ledigen den hoff do jach der Herolczhaimer vnd gab fur in hiet der Tanner ain jar vor gehabt den dinst von dem hoff do geviel do dem Tanner wol das man iem gab zwelif Schilling fur den dinst des selben jares Des gab do die sammung ze Raitenhaslach nach des Tanners rat dem Herolczhaimer zehent halb pfunt pfennig vnd werten in leibleich vnd gutleichen vnd gestuent der Herolczhaimer als dinges ledichleichen von dem hoff datz Sigharting vnd die hantuest die er het von dem Tanner die gelobt der Herolczhaimer ze geben dem conuent ze Raitenhaslach do er do zu sach da hat er die selben hantuest verloren do cham er zu mir vnd pat mich das ich der samung ze Raitenhaslach ze einem vrchund meinen brief gab das der Herolczhaimer die hantuest hiet verlorn vnd das er alles dinges war gestannden von aller ansprach die er auf den diche genanten hoff datz Sigharting het Vnd das der red also sei das han ich disen brief nach des Herolczhaimers pet gegeben dem gotzhaws datz Raitenhaslach ze einem waren vrchund an sand Vitales tag des jares do von Christi gepurd waren tausent jar zwain hundert jar in dem siben vnd newntzigistem jar