Charter Document - 02520308

Ich Ekkart von Tanne tvn chunt allen den di disen brief ansehent oder horent lesen das ich vnd mein svn Ekkarten von Tanne haben gegeben vnserev zwai gvt datze Chirichperch vnd den hof vnd di mvl datze Sigherting vnser vrowen hintze Raitenhaslach ze einem ewigen selgret dvrh vnser sei willen vnd dvrh aller vnser vorvodern sei willen versvht vnd vnuersvht vnd haben vns des verzigen avf vnser vrowen alter das wir immer dehein recht dar an gewinnen vnd das si dev selben gvt schvllen haben mit allem dem reht vnd si ander ir gvt inne habent vnd haben vns dar zv gebvnden das wir in dev vorgenanten gvt shvllen shermen mit vnsern trewen vor allem gwalte vnd vor aller ansprach Das das also stet vnd ewig beleih geb wir disen brief versigelt mit vnsern insigeln Des sint gezevg brvder Or der prior her Wernhart der gvster her Hilprant der chelner vnd mit in all di sammvng ze Raitenh[aslach] her H[ainrich] der Pabenswanter her Ch[vnrat] von Stainchirchen her Gerhoch von Radekk [] der Nevnchircher vnd ander erwerig gezivg genvg Diser brief ist gegeben do von vnsers herren gebvrte woren tavsent jar zwai hvndert jar siben vnd nevnzig jar an sand Peters vnd sand Paules tag