Charter Document - 02520307

Ich Ekchart von Tann der Staufer offen vnd tvn chunt allen den di disen brif sehent oder horent lesen daz ich den hof datz Sigherting der mein rehtez aigen was vnd meiner hausvrowen vron Katrein der got mvezz genaden von mir ier morgengab was han gegebn vnser vrowen hintz Raitenh[aslach] ze selgeraet ze der gegen meins vater hern Ekcharts von Tanne vnd meins prvder Ekharts des Rorer des tages vnd man mein vorgenant hausvrowen vron Katrein der erd enpfalch vnd habn den dikch genantn hof datz Sigherting auf geselt ze Raitenh[aslach] auf fronalter ich Ekchart von Tanne der Stauffer vnd mein vater her Ekchart von Tanne vnd mein brvder Ekchart der Rorer vnd Gerhoch von Radekke vnd habn vns sein verzigen vnd habn in gegeben dem gotshaus ze Raitenh[aslach] ledichleichen vnd vreilichen mit alle dem daz dar zv gehoret versvechtez vnd vnuersvechtez ze veld vnd ze holtz ze perg vnd ze tal mit wismat mit dem mvlslag vnd mit dem purchstal oder swie ez genant ist Jdoch wan der vorgenant hof stvent ze pfand fvr zehent halb pfunt Merboten von Heroltshaim der in auch dar vmb inn het mvest in der vorgenant conuent ze Raitenh[aslach] losen von dem Herolthaimer vmb di selbn pfenning vnd solt der Heroltshaimer dem conuent ze Raitenh[aslach] wider habn gegebn di hantfest di er het da vber daz er wer sein satzvng vnd sein pfant do er do daz solt tvn do het er di selbn hantfest verloren Jdoch gab er den hof in der herren gewalt von Raitenh[aslach] vnd vertzech sich alles des rehts vnd aller der ansprach di er het auf den hof vnd gelobt in ze gewinnen hern Ortliebs hantuest von Wald Ze aim waren vrchvnd daz er sich hiet des hofs verzigen vnd di hantvest verlorn vnd daz der red also sei vnd daz daz selgeret ewichleichn stet vnd vnzerbrochen beleih vnd auch daz gotshaus sicher sei fver alle ansprach so habn wir ich Ekchart von Tanne vnd mein vater her Ekchart vnd mein prvder Ekchart dem gotshaus ze Raitenhaslach ze einem waren vrchvnd gegebn dise hantfest versigelt vnd gewihgt mit vnser aller dreier insigel Der sach vnd des selgerets sintz getzevge brvder Or der prior brvder Wernher der guster brvder Hilprant der chelner vnd mit in alle di samnvng ze Raiten[haslach] vnd her H[ainreich] der Pabenswanter her Chunr[at] von Stainchirchn her Gerhoch von Radekke [] der Nevnchircher Frid[reich] Choepfelman Rvdel von Tal Rvdolf von Geizzing Chunr[at] Noppel Ch[unrat] der Prenner Ortel von Mosen Chunr[at] von Hallenwanch H[ainreich] von Ehmvting Frid[reich] der Chrispelsteter H[ainreich] der Gwiker Ditmar der Helgler Wernher von Aihen Vl[reich] von Aw Ortl vnd Ortlieb des abts chneht vnd ander erberig gezevg Disev hantfest ist gegebn ze Raitenh[aslach] do von Christes geburt waren tausent jar zwai hundert jar in dem sibn vnd nevnzegisten jar an sand Peters vnd sand Pauls tag