Charter Document - 02520306

Wir swester Bendict abbtassin von Lantzhwet vnd aller conuentt tun cunt allen den die disen brief sehent oder lesent das vnser lieber vrivnt her Ludweig der Grans durich got vnd durich seiner sei willen vnd seiner hausfrawen vnd seiner voruodern sei vns ein phunt geltes Regenspurger pfennig vmb funfzehen phunt der selben munsse ze Cholbach ein gut gechauft hat Die selben trew vnd die liebe die er vns getan hat haben wir angesachen vnd haben iem vnd seiner hausfrawn durich got bruderschaft bey in lembtigen gegeben vnd machen sy tailhaftig aller der gut an petten an vasten vnd an allen den guten dingen die got von siner gut an vns geruchet ze wurichen Wir veriechen auch an disem brief das wir alle jar nach seinem tode sein jarczeit vnd seiner hausfrawnn Chunigunden vnd seines vatter eines Rudolfes vnd seiner mueter einer Getrud an sand Jorgen tag began wellen also das an dem selben tag das vorgenant phunt vnserm conuent vmb wein vnd vmb vischs vnd vmb prowt gegeben werde Vnd das das ewichleich geseche vnd staete beleih vnd an welichem jar saumung dar an geschache des nicht sein sol das man die jarczeit nicht begienge vnd dem conuent das phunt als sein vorgedacht ist nicht gegeben wurde so sol der werde abbte vnd der ersam conuent ze Raitenhaslach ein phunt geltz das selbe jar auf vnserm gut ze Buch das bey Otting ligt haben vnd sol dew ee gesprochen jarczeit von in wegangen werden Vnd der sache sind gezeuge her Chunrad der abbte ze Raittenhaslach vnd her Fridreich der prior daselben vnd her Fridreich der chelner vnd her Wernhart der guster vnd swester Berchta dew priorinn vnd swester Ita dew chlenerin vnd swester Cecilia dew gusterin vnd swester Agnes dew subpriorinn vnd vnser bruder bruder Wernhart von Pawngarten bruder Sibot bruder Altman her Seyfrid vnser chappellan Dar uber wellen auch wir das der nachste nutz von dem gut den man an dem nachsten heribst in nympt von vns vnd von vnser schafferin dem conuent vnd dem vorgenanten sand Gorgen tag geben sol als es vorgeschriben ist vnd solen sein vnd seiner hausfrawnn als wol lembtiges gedenkchen ewichleich als todes Vnd dar uber geben wir im vnsern brief versigelt mit vnserm insigel Vnd der brief ist gegeben nach vnsers [herrn] geburt tausent jar zwain hundert jar an dem fumftzigistem jar an sand Valtans tag