Charter Document - 02520304

Ich Liebhart von alten Mvldorf tvn chvnt allen den di disen brief ansehent od[er] horent lesen daz mir abbt Chvnrat vnd div samvngen von Raitenhaslach durch di lieb vnd durich div triwe di si zv mir habent vnd ich zv in habent gegeben den nvtz auf ir hof datz Perchaim mit Stift vnd mit allem dem nvtz der da von chomen mack vntz an minen tod mit dem gedinge als min lester tack ist daz der selb hof vnd aller der nvtz der des tages dar auff ist vrolichen vnd ewichlichen des goteshaus ze Raitenhaslach sol sin noch sol noch mack min hausfrawe fraw Gedraut noch dehain min erwe nimmer dehain ansprache noch dehein krich vmb den hof vnd vmb den nvtz ze Perchaim nimmer gebinne Daz gedinge ist geschehen do von vnsers herren geburt waren tausent jar zwai hvndert jar fumf vnd nevzicgistem jar an sand Medarden tak Dirr red sint gezvch prvder Friderich vnd prvder Burch[art] vnd prvder Erberhart von Raitenh[aslach] Hainr[ich] der pfarrer von Richsach Chvnrat der Rorpeche Andre von Comatenchirch[en] Rudolf Gvtevred Hainr[ich] von Fvrt Virich vnd Ortlib des abbts chnet Chunrat von Dvrenperch Titmer von Haitzing