Charter Document - 02520302

Nos Otto Ludwicus et Stephanus dei gracia comites palatini Reni duces Bawarie notum facimus universis presentes litteras inspecturis quod cum dilecti et devoti nostri venerabilis abbas et conventus sancte Marie in Raitenhaslach a progenitoribus nostris inclite recordacionis libertatem habuerint ex antiquo vini frumenti et aliorum omnium victualium suorum liberum transitum in Purchausen et in Scherding ita ut sine exactione ac inpedimento illic quocienscumque et quandocumque ipsorum necessitas exegerit debeant libere pertransire adicientes insuper ut singulis annis una vice quocumque tempore anni voluerint in locis predictis duo talenta salis ampli ligaminis possint transvehere in perpetuum libere sine muta nos igitur ipsorum devotis obsequiis invitati huiusmodi graciam nequaquam volentes nostris temporibus minuere sed augere ipsis supradictam libertatem non solum confirmavimus et confirmamus verum eciam ob specialem devocionem dilecti nostri Chunradi venerabilis abbatis eiusdem loci et conventus ibidem libertatem unius talenti salis maioris ligaminis et octo talenta minoris ligaminis addimus liberaliter et benigne ita ut decetero in perpetuum annis singulis quocumque tempore anni voluerint tria talenta salis maioris ligaminis et octo talenta minoris ligaminis in predictis locis Purchausen videlicet et Scherding trans ducendi sine muta et exactione qualibet quocumque vocetur nomine iam inposita vel de cetero quacumque occasione inponenda liberam habeant facultatem Et ut premissa gracia ex nunc et in posterum nullum excusacionis et inpedimenti obstaculum paciatur volumus et precise mandamus ut mutarii predictorum locorum qui pro tempore fuerint nullius obligacionis locacionis vel ordinacionis mutarum predictarum pretextu que per nos vel successores nostros facte fuerint ipsos in transvectione et libertate predictorum salium necnon omnium victualium suorum sicut superius est expressum inpedire audeant vel presumant Si vero ipsi mutarii huius nostri mandati et gracie fieri presumpserint quod non credimus transgressores omne dampnum quod ex hoc ecclesia de Raitenhaslach pertulerit eis dem refundere tenebuntur et nobis decem libras denariorum Ratisponensium nichilominus pro emenda ad quod ipsos faciendum cogere promittimus pro constanti Premissis eciam est adiectum quod quocienscumque nos forsitan contingeret processu temporis nostra sigilla presencia inmutare tociens eis sub premissis pactis et condicionibus huiusmodi privilegium tenebimur et firmiter promisimus innovare In quorum omnium evidens testimonium atque robur presens instrumentum eis dedimus nostrorum sigillorum robore communitum Datum et actum apud Strubingam anno domini millesimo ducentesimo nonagesimo quinto septimo decimo kalendas maii