Charter Document - 02520299

Wir Ott Lodwich vnd Stephan von gotes gnaden pfallentzgraven ze Ryn hertzogen ze Baieren tvn allen den chvnt die disen brief ansehent od[er] horent lesent daz wir gesehen haben vnd gelesen vnsers hertzenliben vater brief dem got genad hertzog Heinrichs von Baieren An dem selben brief hat er erchant vnd bestetiget dem goteshavs von Ratenhaslach alle di gnade vnd di vreitvm vnd div rehte div der stvl von Rome vnd di cheiser vnd di chvnige vnd vnser vorvaderen dem orden von Cytel vnd dem goteshavs von Ratenhaslach habent gegeben vnd hat verboten an dem selben brief allen sinen amptlevten vnd sinen rihteren vnd schergen daz si daz vorgenant gotshavs vnd alle ir levt vnd ir gvt niht svln noch getvrren besweren noch leidigen mit herbergen vnd mit fvtern noch mit deheinem twanchsal noch auch di rihter niht svln twingen ir levt vf dehein taidinch vmbe dehein sache noch vmbe dehein reht wan si selbe daz vrlavb habent vnd den gewalt daz si alle die sache horen di ir levt angeent vnd so si siv geherent daz si di selbem sach mit volligem gwalt mvgen vnd svln rihten an als vil ob dehein des gotshavses man wurd begriffen mit sogetanen sachen daz man mit dem tod vber sin leben solt rihten wan geistlich orden sogetan geriht niht tvrren getvn so sol der rihter den selben man nemen alein als er mit der gvrtel ist begriffen vnd sol allez daz gvt daz der man hat varent vnd vnvarent dem goteshavs beliben Wand wir vnseres hertzenlibes vater brief gesehen haben vnd di andaht di er gein got vnd gein vnser frowen vnd gein dem gotshavs ze Ratenhaslach hat gehabt di wellen wir niht minneren svnder wir wellen si mit gantzem willen vnd besvndern gnaden meren vnd volfuren Da von gebiten wir allen vnseren amptlevten vnseren rihteren vnd vnseren schergen daz si des goteshavses levten von Ratenhaslach niht getvrren noch svln besweren noch laidigen mit herbergen noch mit fvteren vnd mit deheiner twanchsal Swelher rihter oder scherig daz vberget so sol der rihter vns geben ze bvzze zehen pfvnt der scherge fvmfiv vnd sol dem gotshavs sinen schaden abtvn Wir gebiten auch allen vnseren rihteren vnd schergen in allem vnserem lande daz si deheinen des gotshavses man niht betwingen noch gebiten ze chomen vf dehein ehaft taidinch noch vf dehein besvnder taidinch wan von altem reht vnd von vnseren besvnderen gnaden vnd gab si den gewalt habent vnd svln haben daz si alle di sache svln horen die ir levt angeent vnd so si die horent so svln si mit volligem gewalt rihten Swelich rihter oder scherig der sache deheiniv vbervert oder zebrichet als dike er daz tvt so sol vns der rihter zehen pfvnt geben vnd der scherig fvmfiv vnd dem gotshavs sinen schaden abtvn Geschaech aber daz daz des gotshavses man sogetan missetat tet dar vmb man rihten sold vber sin leben mit dem tod so sol der rihter den selben man nemen als er mit gvrtel bepfangen ist vnd allez daz gvt daz er hat varent vnd vnvarent daz sol dem gotshavs beliben von Ratenhaslach Nem aber der rihter gvt fvr sinen tod des sol der rihter des gotshavses geschol sin sam er ez genomen het vz einem brvder hof Vber di sach alle verbiten wir allen den vorsprechen vnd taidingeren di in vnserem lande sint bi dem aide vnd fvmf pfvnden daz si immer iht getaidingen oder ertailn wider allen den vreitvm vnd wider div reht div wir dem gotshavs ze Ratenhaslach erchant haben vnd im gevestet haben mit vnseren briven Auch binden wir vns dar zv vnd geloben bi vnseren gnaden daz wir alle vnser rihter vnd schergen da zv betwingen mit den wandeln div vorgenant sint daz si behalten dem gotshavs von Ratenhaslach alliv div reht vnd den vreitvm vnd di gnad di wir im vnd vnserem getrewen abbt Chvnraden vnd siner sammvng haben gegeben Ist aber daz man des gotshavses man einen ansprichet vmb eigen vnd vmbe lehen vnd daz daz selbe aigen vnd lehen des mannes ist den man dar vmb ansprichet vnd niht des gotshavses der sol daz reht von vnseren rihteren tvn vnd niht vor dem abbt an di levt di des gotshavses inwertz aigen habent daz sol der abbt der danne ist selbe rihten wan di selben levt bedenthalben des gotshavses sint Ez ensol auch dehein vnser rihter niht rihten von des vorgenanten goteshavses aigen Vnd daz im daz allez also stet vnd vnzebrochen belib dar vber haben wir dem vorgenanten gotshavs ze einem waren vrchvnde gebn disiv hantvest versigelt mit vnseren insigeln Disev hantveste ist gegebn datz Stravbing da von Christes gebvrte waren tavsent zwai hvndert jar in dem fvmf vnd nevntzigistem jar