Charter Document - 02520295

Wir Hainrich von gotes genaden abpt von Sewen tun allen den chunt di disen brief ansehent daz vnser lieber friunt vnd herre abpt Ch[unrat] von Retenhaslach mit zwain sinen prudern pruder Pozan vnd pruder Friderich chom in vnser haus geriten vnd was ein chrieg vnd ein vnminne zwichschen sin vnd Chunrat des alten Dechsers vnd sines sunes Heinrichs vnd baten in daz er sin hulde gebe den Dechsern wan si wider sin hulde heten getan Daz tet vnser lieber herre der abpt von Retenhaslach mit der beschaiden rede daz di Dechser dar giengen vnd gaben dem abpt von Raetenhaslach in sin hant alliv diu recht vnd allen den chrieg vnd alle ansprach swi der was di si heten gen sinem gotzhaus vnd daz Heinrich im vnd sinem gotzhaus diu triuwe immermer laist diu ein man sinem gotzhaus vnd siner herscheft von recht laisten sol Daz diu rede ieman verchern sul oder muge dar vber haben wir vnsern brief gegeben geuestent mit vnserm insigel ze einem vrchund Daz der rede also si des sint ziuch pruder Bozan vnd pruder Friderich von Raetenhaslach Albertus pfarrer in Obing Friderich der Chiemperger vnd F[riderich] sin svn H[einrich] Prisfuez Otto Virich Ortlieb Haeinrich des abptes chnecht von Retenhaslach Hertwicus schriber von Sewen der diu hantuest hat geschriben Daz ist geschehen do von Christes geburt waren tausent jar vnd zwahundert vnd in dem vier vnd niwenzgisten jar an sant Ambrosin tage