Charter Document - 02520294

Ich Ortlib von Wald vergihe vnt tvn chvnt allen den di disen brief ansehent oder horent lesen daz Ortlieb von Steten vnser aigner man dem got genad dem goteshvs datz Raitenhaslach het gelihen zwelf march silbers also daz daz selb goteshvs daz vorgenant silber als Ortel niht enwere solt geben sinem svn Otten Nv hat got verhangt daz der vorgenant Ortlieb von Steten chvrtzlichen wart zezvchet von disem eilende vnd davon so han ich Ortlieb von Walde vnd Ott von Vberekch des chindes vnd Stephan sin veter di zwelf march silbers von dem goteshvs ingenomen gar vnd gantzlich dem chinde ze behalten vntz daz iz zv sinen jaren chom daz man iz anderswo ninder anlegen sol wan dem chinde ze fvdervng Vnd des pin ich Ortlieb von Walde des chindes schapher vnd behalter vnd sin ene Ot von Vbereche vnd des chindes veter Stephan Wir jehen avch an disem brief daz das goteshvs von Raitenhaslach dem chinde noh chainem sinen vrevnden nihtes niht mer schvldich ist chlain noh groz Des sint gezevch der Pvchpeche Ot von Vberekch Stepan der Stetner Vlr[ich] der Awer Vlr[ich] vnd Hadmar von Talhaim Friderich von Tvnigen vnd ander erwerig levt Darvber han avch ich gegeben dem goteshvs von Raitenh[aslach] disen brief versigelt mit minem insigel des jares do von Christes gebvrt waren tavsent jar zwai hvndert jar vnd in dem vier vnd newnczigistem jar Vnd der vorgenanten sache aller pin ich Ortlieb von Wald vnt Ot von Vberech vnd Stephan von Steten porgen