Charter Document - 02520293

Wir Ditmar pharrer von Heselwanch and Albreht pharrer von Obing verjehen vnd tvn chvnt an disem brief daz der ersam abbt Ch[vnrat] von Raitenhaslach dvrch vnser peider pet sines goteshvses gvt datz Chvnihing hat gelihen ze pavmansreht an all anlait Hainr[ich] dem Aicher zwain jaren also mit sotanem gedinge daz er daz selbe gvt daz Chvnihing sol pavlichen legen an stadel an haws vnd an dem akcher vnd sol avch iz dienen an allen dingen als ander des goteshvs gvt im dient swie der dienst ist genant iz si an phennigen oder an traid vnd vber di zwai jar so sol Hainrich der Aicher vnserm herren dem ersam abbt sin gvt wider avfgeben an all ansprach vnd an alle Widerrede vnd sol chain erbreht noch chain ander reht daravf niht ziehen Daz disev rede also stet si werden wir porgen hincz dem ersam abbt von Raitenhaslach mit vnsern brieven vnd mit vnsern insigeln Diser brief ist gegeben an sand Vicencii tag des jares do von vnsers herren gebvrt waren tavsent jar zwai hvndert jar vnd drev vnd nivntzich jar